Archaeological Survey of India (ASI) chuan Uttar Pradesh State-a khawpui pakhat Agra hmuna India ram rohlu Taj Mahal dinhmun chu him tawk lo leh a bul vela sumdawnna hmun tam tak chu thenfai a ngaih hle thu an sawi.
Taj Mahal bul leh a chhehvelah hian dan phal loha in sak leh sumdawnna building 470 lai mai awma report a ni a, heng zingah hian Taj Mahal laili atanga 500m radius a hlaah restaurants, cafes, emporiums tam tak a awm a ni.
Hengte hi kum tam taka upate an ni tawh a, heng dinhmun him lo te avang hian ASI chuan thuneitute hnenah FIR te a lo thehlut tawh thin a, mahse thuneitute lam atangin thenfai tumna tak tak a la awm loh thu an sawi a ni. Times of India (TOI) chuan Director General of ASI-in heng sumdawnna hmun leh intihhlimna hmun hlauhawm te thianfai tura UP sorkar leh District Administration te hnenah nikum lam daih tawh khan FIR a lo thehluh tawh thu report a dawng a ni.
ASI officials te chuan vawi tam tak Taj Mahal awmna local authorities te hnenah Taj Mahal dipdaltu tam tak te thianfai turin rawtna kan thlen a, mahse vawiin ni thlengin awmzia a la awm loh thu an sawi a ni.
Superintending Archaeologist Raj Kumar Patel chuan ram rohlu humhim nana ASI-in FIR a theh luh chungchangah hian ASI thuneihna tlemzia a sawi a, ASI Director General Office hian Taj Mahal tana thil him lo tihchhiat theihna order pe chhuak thei mahsela a taka titu turte chu Agra Development Authority (ADA) leh Local Administration an nih thu a sawi bawk a ni.
Taj Mahal Dinhmun hlauhawmah ding mek
