By Zoremi Hmar Zote
A kut vun zûr tiak tawh chuan thingpui no chu a keng khur der der a, bathlar thlang lam, a tu ten ‘apu seat’ an tih mai, kawl lam hla tak thlira a thut thinna thutthleng chu a pan hlau hlau a. A lo tun fo tawhna kawngkhar phenah chuan a tiang, a hman nasat luat tawh vanga hnûm hlarh chu a’n tung tha leh te te a, fimkhur tak chung chuan a thu ta a.
Ni, an vanglai chuan khua atanga chuan phak tawh phawt ram chu dai dar loh bik a nei lo va, sa tinreng chhaia an lo rammut ve thin tawhna ram lah sawi sen a ni bik lo. =hian zahova laifei chawia an lo fan thin ram te chu romei chuan bawmin an paw chúk hlawm a, Savawm a kahna mual ngei mai pawh romei zing chuai chuan a hliahin, a lang thei tawk tawk a ni. A mit vun chung lam lo uaiin a hliah lek lek tawh kara a mir de sar sar chuan chu’ng an tuanna mual hlui te, a vanglai hun leh tha leh zung a lo sen ral tawhna hmun hrang hrang chu an thlir kual a, thingpui sen hang lem leh khalh pah chuan a lung a leng a ni tih a inhai lo hle.
Mualpui ram, tuna a nupui duh tak lo ni ta te nena an inlawm kuma lova an neih te pawh chhâwlhringin a kâp hring leh hle tawh a, hemi kuma an hlimzia, a nupui nen pawh hemi kuma intawng an nih dan te, inneihpuia a sawma a lo pawm ve thu a hriat phata a lawm lutuk tihngaihna hre lovin a pawm thut a, a vir kualpui chiam thu te a’n ngaihtuah chhuah leh chuan a kiai sak a, ni e, a tan chuan an khua in za nufa vel leka nula zingah kha chuan Dengi tluk zo kha an awm thei lo reng reng ringawt mai a ni. Dengi hi nula lian zeih zawih, ngo lampang, thau si lova sa tha lam pawl mah zawk niin, nula taima leh fing tak a nih avangin a vanglai hian to pawh a to viau. An inneih lawmna pawh an hun lai angah kha chuan ropui tak a ni. Ran lu an kim a, a khual a tualin ruai an theh mup mup a, an puarin a tlai tlang hle a nih kha.
Pathian malsawmna dawngin tu leh fa tam tak neiin, Aizawlah pawh veng lian ve takah an cheng ve mek a. A nupuiin a boralsanna pawh kum sarih lai a lo ni ve ta reng mai. A fa ten sawrkar hna lian tak tak thawkin dam chhung khawsak inrelbawlnaah lungngaihna tur a nei lo va, in leh lo nghet a din tawh bawk a, a lan danah mai chuan lungkham tur leh rilru hahna tur reng a nei lo. Mahse chutiang a ni hauh si lo. Hringfate hi hringfate kan nih chhung zawnga min bawh buaitu tur, kan thâwk têk têk chhung zawnga kan hriatrengnaa bet ve tlat tawh tur nunhlui ngaihna te, lunglenna leh khawharnate hian ani pawh a phuar ve mek a, chu hun liam hnu ngaihna leh lunglen khawharna chu a tan beih tham tak a tling ni tin ta mai.
A thingpui te a in zo ta bawk a, in chhunga lut tura thawh a han tum uaih a, lut pawh ni se tumah kawm tur an awm leh chuang dawn lo va, a tu leh fate chu thu thup mah se an phone an bih leh vek ang a, be mah se a hmel pawh en mang lovin a rul tawk lekin an chhang leh ang. TV-ah cartoon a chhuak leh ang a, entu mumal awm lo mah se hmeh sawn dawn chuan an teu leh hlar ang. Thawh tuma a ding uaih tawh chu thu lehin, ngaw dur khup te leh tlang mawi tak tak lang phâk chin chu thlirin a thu tha ta sauh sauh a.
An naupan ve lai te a ngaihtuah a, unau pakua niin an chhung an ruàl hle a, ruàl hle mah se a nu leh pa an taimak avangin rual awtin an awm ngai lo. A pa thu an awih thinzia leh an nu leh pa an zahzia te, a pa fuihna zo nun ze mawi hrang hrang, tlawmngaihna leh rinawmna, huaisenna leh aia upa zahna a taka an zawm thinzia te a ngaihtuah a, tun lai angin inawm tleina hrang hrang phone, TV leh computer te la awm ve lo mah se an nun a hlim zawkzia te a ngaihtuah neuh neuh a. =hangthar nunze danglam tawhzia leh, kan zo ze mawi ten chuai lam an pan hret hret ni-a a hriatna chuan a rûmtir nghat a, enkawlna khauh tak hnuaia a kaihhruai a fate chuan sual kawng zawh lo mah se, a tute erawh an mizia a dang ta deuh tih hriain, an naupan lai anga thuawih diak diak tur leh zo nun ze mawi vawng nung tlat tura beiseina chu a hlawhtling teh chiam lo tih pawh a hrethiam; engtia tih chi nge tih pawh vawi tam a lo ngaihtuah tawh a, a phâk ang tawk chuan a tu leh fate chu a zilhin a fuih ve niin a inhria a, a hmangaih em em vek tih pawh phat rual a awm lo.
A tu leh fate laka a beisei chu a sâng viau lo. Phone ringawt buaipui lovin be sawm bal ve thin se la, a titi te ngaihthlaksak ve se la, an vanglai chanchin te, an hun liam tawh thawnthu ngaihnawm tak takte chu hrilh ve a duh a ni. A biakin chhâng liam puat lovin ngaihven tak tak ve se la, a dam chhung a rei tawh dawn lo va, an tan a hlutzia hrethiam ve se a duh takzet a ni. An in chu lianin, a chhung pawh ropui taka chei ni mah se a tan chuan ram ruak ang mai a ni a, mihring chêng teuh mah se hmun khawhar a ni. Hah leh rim taka a din sa a in chhung chu thlakhlelhna a nei tam lo hle a, khawi ilo chhuakvâk thei a nih tawh si loh avangin a awm lo thei si lo.
Tar kawl kan awm em? Hlim tak leh dam thlahlel ngawih ngawihin kan siam thei a, chau leh mal tak, khawhar takin kan siam thei bawk. An hlutna hrethiam phak lo chuan hlutna a nei bik lo. Kan dam ang a, kan la tar ve vek dawn; kan tar huna kan awm dan tura kan duh angin vawiin atang hian tarte i enkawl ang u. Nu leh pa, pi leh pute zah leh hlut nachang hre lo chuan malsawmna a dawng ngai lo tih hi vawng tlat ila, upate tan khawvel thar i din ang u.