Site icon The Aizawl Post

Tata SK 710 Fight Night 3

Tata SK 710 Fight Night 3
Mizo boxer-te kawng buatsaihna tur leh sawm rualin professional an luhchilh theihna’n Tata SK Fight Night 3 buatsaih a ni dawn a, Assamese boxer pali an tel bawk ang.
LPS Promotion chuan Dawrpui Multipurpose Centre, Aizawlah zan hnih chhung inhnek a huaihawt dawn a; inhnek vawi 18 awm tura tih niin, March ni 10, Zirtawpni zanah inhnek vawi sarih leh March ni 11, Inrinni zanah inhnek tum ruk a awm dawn a ni.
2022 LPS Pro Fight boxer thate’n zinkawng thui zawk an zawh theihna tura tih a nih rualin Mizo boxer 10 leh Assamese fighter paliin professional an luhchilhna tur a ni nghal ang.
Pro Fight champion lai panga zingah featherweight title kawltu Lalro-sangzuala’n mimal thilah harsatna a nei a, inhnek tura tih a nih hnuah lightweight champion Vanlalawmpuia a inhliam a, an inlan thei dawn lo.
Flyweight champion Laldinsanga’n professional vawi thum a khelh tawhah a bitum a knockout vek a, Adarsh Kamei nen an innuai dawn.
Welterweight champion C. Lal-hruaitluanga’n Arnab Chirua a hmachhawn dawn a, profssional tum nga a khelh tawhah a la chak vek a ni.
Nikum September khan Pro Fight atangin Lalrinngheta’n professional a luhchilh a, final-ah rin hlawh lo zawk ni chungin F. Zoramchhana a hneh. Tun hi a inlan leh hmasak ber tur niin, tunlaia combat sports huang hrang hranga tel hnem tak Nazareth Lalthazuala nen an intawng dawn.
Kawng dika kir tumin hruihrual chhungah Mizo boxer langsar Zotea leh 2015 Pro Fight bantamweight champion HC Lalramfela an lut ve thung dawn. An inhnek hnuhnun vawi hnihah an tlawm zawn ve ve a, profe-ssional luhchilh tur ve ve an hma-chhawn dawn a; Zotea’n Luangmual Vengthlang boxer Johan Lalrinpuia bitumin, Ramfela leh Swarupam Bhattacharjee an inhnek ang.
March ni 9, Ningani zing dar 8-ah LPS office, Zarkawtah boxer-te inbukin an inep dawn a; Tata SK 710 Fight Night 3 inhneka a chakin Rs. 10,000 leh a chak lo zawngin Rs. 5,000 an dawng dawn.
Zothan Autoworks
leh LPS inrem
LPS Promotion chuan March 2021 khan a vawi-khatna’n Mizoramah profe-ssional inhnek a huaihawt a, LPS Fight Night 1-ah Lalrin-sanga Tlau chuan Ghanaian Eric Quarm hnehin WBC Youth Super Featherweight title a hnekchhuak.
November 2021 khan LPS Fight Night 2-ah NT Lal-biakkima’n Thai fighter Gerttipong Kumsawat hnehin professional weight zang berah IBA Inter-Continental title a humhim bawk a ni.
Mizorama Tata Motors commer-cial dealer Zothan Autoworks-in title sponsorship chang felin, Tata SK 710 Fight Night 3 tiin a hming vuah a ni a, September leh October-a buatsaih tur 2023 LPS Pro Fight-ah title sponsor a ni tel bawk ang.
Zothan Autoworks hian Mizoram boxing-ah hnuhma a nei nual a, Pro Fight-ah vawithum – 2016, 2019 leh 2022-ah title sponsor a ni tawh a, a vawilina’n he dinhmun luah tur hian LPS Promotion nen Fight Night 3-a inremna an siam rualin an indawr fel nghal a ni.

Exit mobile version