Daily Newspaper

TAWNG THLÛK MILA ZIAH

87

-PC Thangzikpuia

Mizo tawng hi chu kan lam rîk dan leh kan thlûk fân dan hìan a awmzia a hril danglam thei hle a, hei vàng hian thlûk chhinchhiahna changtlung tak kan la mamawh belh zel dâwn ni pawhin a lang. Amaherawhchu, a mi nâwlpuiina inangkhata kan inhman tawm thlûk chhinchhiahna hmelhriat tlàn sa kan neihte hi a la famkim tâwk rih lo deuh avangin, social media-a ziaka titi honaa tuallâi tawng eng eng emaw kan hmannaah te hi chuan kan tawng thlûk mila ziah (phonetic) hi kan uar ta hle a. “Chuti chuan han ti mai ilaah!” ti tein leh, “A hlauha ka’n hlauhzia mai chuuhh!” ti tein thlûk chhinchhiahna dah âiah hawrawp dah dawbawla ‘ilaah, chuuhh’ ti tea ziah mai hi kan ching thin a ni.

Kan thu uar tum dan kha thlûk chhinchhiahna kan neih sate’n an phawh chhuah zawh loh kan hlauh vàng emawa, hetianga thu lam rik tâwpa ‘h’ lam ri tela hawrawp ziah dawbawl mai ang chi hi chuan Mizo tawnga thumal tih danglam dan kal phung (inflection rules) a khawih pawi pha ve lêm lo a. Chuvangin, hetianga thu ziah hi nakin lawkah chuan chin dan phung pangngai ve rêngah pawh kan la nei ang a, kan lem chan (lemchan—ni lovin) thawnthu-a a changtute inbiakna tawngkamah te pawh kan la hman uar deuh deuh a rinawm.

Tute emaw kha an awmna hmun a hlat thu kan sawi uartirna turah te hian, “Khuuutah, Delhi thlangah daih a nia!” tia kan thlûk fàn dan mila a sipel han ziah mai ang chi te hi a remchan châng a awm ve thin niin a lang a. Hemi chungchâng thu hi social media lama ka sawinaah, nikum lawka lehkhabu an tlângzarh pakhat, lâr ve angreng deuh ziaktu chuan, “I sawi ang khân kei chuan ka lehkhabuah khân ka hmang nual asin,” tiin mi rawn hrilh a. Hmân ni lawk khân ziaktu lâr ve tak pakhat pawhin phone-in mi rawn bia a, hetianga phonetic key-a thu ziah hi kan sawi dun nual a, a lehkhabu ziah leh mêkah hman a tum thu mi rawn hrilh ve leh bawk.

Hetah hian thil pawimawh awm ta chu: phonetic ang chi-a thu ziah dan turah hian grammar atangin ziah dan tur kal hmang (kalhmang—ni lovin) a awm ve chiah lêm lo a; mahni’na kan thlûk fàn dan phawk chhuak thei tur nia kan hriat anga ziah mai kha a ziaktu thu neihna (thuneihna—ni tei vet lovin) a ni ta tlat a. Hetah tak hian kan lehkhabua mî inbiakna tawngkamah te phonetic hi kan chelek dâwn a nih rau rau chuan mahni’na form mumal tak neia kan hman thiam a tul ta a ni.

Entir nân—kan thawnthu ziaha a changtute inbiaknaah khân a chânga ‘sawwtah’ tia ‘w’ pahnih kan ziah thian laia, a thena ‘sawwwtah’ tia ‘w’ pathum kan ziah a, ziah dan inang lo zuta kan ziah phung mai chuan a chiri nuaih thei dâwn a. Chuvangin, hetianga kan thu lam rîk dan mila a sipel kan ziah dâwn rau rau chuan mahni’na ziah dan bik neia kan chelek thiam a tha ang a, ‘hetah’ tih hi ‘heetah’ tia kan ziak a nih chuan, kan thu ziah chhûnga phonetic hi kan hman nawnnaah pawh khân ziah dan ngaia ziak lehin, form neihtir kha a fuh dâwn ta a ni.

Social media vela group holam deuh, fiamthu group angah te hian hetianga thu ziah hi kan ching hle a. Social media te hi chu ziaka titi hona hmun a lo nih thin avangin hetianga kan tawng thlûk mil tura a sipel ziah hi lo insawiselsak chiam chi pawh a ni kher lo ang a. Chutih rual erawh chuan a tam zâwk hi chuan hetianga a sipel kan ziahnaah hian a ziah dan thu-ah mahni pawhin ziah dan kal hmang mumal bik kan nei hlawm lo niin a lang a, ‘ila’ tih ziah uar nâna ‘ilaaah’ tia kan ziah laiin, hetianga ziaktu ngei hian a bul lawkah ‘ilaahh’ ti tein a chi dangin kan ziak leh mai mai thin a. Mi pakhat pawhin mahniin ziah dan bik kan nei thin hlawm lo a ni. Hetiangah hian phonetic-a thu ziah hi kan leklam duh a nih rau rau chuan mahni tal hi chuan ziah dan bik mumal tak kan neih a tha hle àwm e.

Eng pawh ni sela, hetianga tawng thlûk dan mil thei tura thu ziah dân chi khat hi insawiselsak ngawt chi a ni lo ang a, a thiamte’na a hmun dik taka an han chelek zauh mai thin te hi chuan an thu ziah kha a ti fiah ve riau thin a, hei vang hian phonetic-a thu ziah hi kan la uar chho zel maithei a; chutih rual erawh chuan a remchanna lai bik riaua kan han chelek zauhna ang chi tih lovah hi chuan, thupui hlapui vaina ang chi thu leh hlaah te erawh hi chuan leklam loh hi a la tha zawk zelin a rinawm a. A chhan chu, hetianga a nazawnga hawrawp ziah dawbawl chiam chiam hìan kan thu ziah kha a ti zahawm lo ve thei zâwk thin niin a lang. Tichuan, phonetic hi kan chelek zauh duh a nih pawhin, a hmanna hmun dik thlang thiam chunga form fel tak neia kan chelek thiam a tul ta niin a lang.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy