Daily Newspaper

TAWNGKAM HLEI

17

Dr. C. Lalrampana

Midang tana pawi lo chi, mipui tana tangkai tur si kan hriat ve chhunte pawh han thai kawi ve hlek ila mi lo khak ching, thil intihre tak tak, han belh chiana eng-teh-ual ni chuang bik dêr si lo Mizote zingah kan la awm nual mai!

Zo tawng Dictionary Rev. Z. T. Sangkhumate unau thumin taima taka an siam 1st. Edition 1997 p 598-ah chuam “tawngkam hlei” tih hi -“kam hlei, tawng nazen, lo inrawlh ve sek, mi huat tur dawn lova sawi ching” tia hilhfiah a ni. Social Media hrang hranga mi thu ziak chungchang lo sawi (comment)-tute zingah tawngkam hlei tak tak hmuh tur an la awm nual mai hi inzir nasat kan la ngai nasa hle. USA-a awm kan thiannu chuan-“Social Media-a mi tam tak tawngkam dengkhawng hman ching thinte khan sim thei se, a zahthlak mah mah chu a ni e, ka lo ip chwih chawih thin,” a ti.

March-June, 2021 thla chho vela Mahmawhtute thian team speaker Pu James Lalramliana leh amah tantu anga lang dêk dêk tawhte beih an nih dante phei kha chu ringtute tih atana mawi lo tak tak a tam hle. A thusawi kha a tha kan ti lo a nih pawhin khati taka beih kha a tulna a vang hle. Amah kha mi tam tak rilruah a tlak nat phah hlauh zawk nite pawhin a lang. Ani chauh kha ni lovin midang dang pawh tawngkam dengkhawng tak taka den leh tawngkam feikibara khawh zuai zuaite ching thin an la tam hle. Hengho hian inzir tur an la ngah hle.

Sawiselna hi hring nunah a tel ve lo thei lo. Mahse, sawiselna tha leh tha lo (constructive criticism & destructive criticism) a awm. Tuna kan khawsak dan hi chu mimal leh sorkar pawh ni se, a tha lo zawnga sawiselna (destructive criticism) deuh hlir hmuh tur leh hriat tur a awm thin hi hnam hnufual (backward class or ST) kan nihzia tarlangtu a ni lehzualin a lang.

Kei phei chuan a tha lo zawnga sawiselna (destructive criticism) hi ka tawng hnem khawp a, mahse, hmirtesen zar tlukah pawh ka ngai lova an thatna turin ka tawngtaisak zawk thin. Ka thil hmuh lawk leh thlir lawk (vision)-ah ka chian chuan a tawk viauin ka hre thin. Hetih rual hian a tha zawnga sawiselna leh thurawn tha (constructive criticism & good advice) ka dawng nual bawk thin. Hei hian min tifing var sawt thin a, ka lawm thei hle.

Sam 19:2 -“Chhun hian chhun hnênah thu a sawi chhawng zel a, Zan hian zan hnênah hriatna a lan chhawntir zel a,” tih ziak angin mihringte hi tumah thil zawng zawng hria leh famkim (perfect) an awm lo. Scientist, IAS, doctor, physician, zirtirtu leh sorkar milian leh mithiam rualte pawh hriatna inhlan chhawn atang veka mifing leh mithiam an ni. Chung finna leh thiamna zawng zawng pawh chu Pathian atang veka chhuak a ni. Pathianah chauh famkimna a awm si a. Social media-a ziak emaw, tawngkam emawa tawngkam hlei tak takte pawh hian hriatna inhlan chhawn avang chauha mite na tak taka sawisela tawngkam feikibara khawh zuai zuai thei an ni tih hi hre nawn se a duhawm hle.

Mihringte hi innghattawn (interdependent)-a nung kan ni a; thiamna finna pawh a inchen vek hek lo. |awngkam hlei tak pawh hi a bulah kar khat chenchilh ta chiah ila sawiselna tur chu kan hmu ve tho vang. Mi a sawiselate ai maha sawisel ngai nasa a ni thei bawk.

Rorel lai sorkar pawh hi eptu lama an tan laia an sawiselna dinhmunah tho an ding veleh chãwk thin. Eiruk huaa sawisel ching, a taka mipui chan ai eirute mahni hmelhriat, chhungkhat laina hnai leh vuavang an nih avanga tai pawng pawnga sawimawia tan leh tlat chingte pawh kan awm nual a nih hmel. Sorkar mah hetiang a nih chuan khawtlang, pawl, kohhran, NGO, chhungkua leh mimal phei chu han inchhui chiang tawn tak tak ila tute hi nge sualna nei lo leh tha famkima thiamna famkim nei awm ang le? Mihring mithmuhah chuan Pathian fapa Isua meuh pawh khan sawiselna a tawk a nih kha! Chuvangin, a tha zawnga sawisel leh thurawn tha inpektawnte hi uar ila, tawngkam hlei lutuk lên fo lo ila kan insiamtha tawn thei zawk ang.

Tul lova ngaihdan lo rawlh ve sek te, tawng nazawng te, mi huat tur ngaihtuah lova thil sawi pawp pawp te, inchhekarbawmte hi sim ila, a tha zawng leh hlawk tlanna tur zawnga thurawn leh induhsaktawnte hi chhunzawm zel zawk ang u.

NB: Article hi keima tawnhriat leh ngaihdan public inerest atana ka ziah a ni e. (See-Article 19(1)(a) of the Constitution of India & CCS rules 8(3)).

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy