Sawrkarin partial lockdown inkaihhruaina a siam zinga, biak ina zing tawngtai inkhawm kal thei tur zat bithliah siam chu a taka hman remchang lo a nih avangin sut leh thuai turin sawrkar an phut tih MPC Thalai chuan an sawi.
Thuchhuah siamin MPC Thalai Gen. Hqrs. chuan, Mizoram sawrkarin kohhran zing tawngtai inkhawm chungchang a rel dan chu a Kristian rilru lo hle-ah a ngai tih sawiin, ‘Hrileng mek karah pawh kohhran zing tawngtai inkhawm neih chhunzawm leh an pawisak loh lai a, inkhawm thei tur zat an bithliah kher hi chu, kohhrante palzutna lian takah kan ngai a. Kohhran kalphung kalh zawngte, kohhran mite inthlahrunna tur leh an phurrit belhchah sak zawnga rorelna kalpui tawh loa, tun aia uluk zawk leh chik zawka ngaihtuahna seng tawh turin Mizoram sawrkar kan chah a ni,’ a ti.
Biak inah mi 50 chuang zing tawngtai inkhawm kal se, Pastor leh Upa ten hnar bik an nei dawn nge, biak ina zing tawngtai inkhawm duhte tan task force-te, kohhran hruaitute hnenah dilna siam hmasak mai tur, tih sawifiah tur leh, mi 50 aia tam zing tawngtai inkhawma kal lo tura thupek siam chu a rang thei ang bera sut turin sawrkar an phut tih MPC Thalai thuchhuah hian a tarlang.
