Taxation-in sum chhunluh
tura beiset zat an tlin hnai
Sawrkar kum kal mek chhungin Taxation department chu cheng vaibelchhe 1000 chhunglut tura beisei an ni a, tunah hian cheng vaibelchhe 670 chuang an chhunglut tawh.
Taxation department hotute sawi danin, state sawrkar sumbawma chhiah an chhunluh theih dan hi chi li (4) a awm a, Goods & Service Tax (GST) ah state-in amaha a lak bakah central-in a lak state nen an insem dun a awm a; state-in a lak Value Added Tax (VAT) leh professional tax a awm bawk. Central nena intawm Integrated GST hi chhiah lakluhna leh state sum lakluhna lian ber a ni.
State GST leh VAT ah hian kum hmasa (2022- 2023) lama lakluh laiin kum kal mek (2023- 2024) a lakluh a pung zawk ve ve laiin, professional tax-ah cheng vaibelchhe 1.79 in a hniam zawk a; a chhan ber chu sawrkar hnathawkten an professional tax pek tur hi instalment-in an pe thin a, kumina la pe kim lo an tam vang tih an sawi a ni.
Kumin Mizoram budget-a an department-in chhiah an lakkhawm atanga sawrkar suma lut tura beisei zat (target) chu cheng vaibelchhe 1000 a ni. Tun thla 7 chhunga chhiah an lakkhawm tawh hi za zelah 67.11 a ni a, chhiah lakkhawm atanga sum luh dan en chuan budget estimate hi khum ngei turah an inngai a, revised estimate erawh awm leh tura ngaih a ni tih an sawi.
The Aizawl Post zawhna chhangin Taxation hotute chuan, sawrkar kum kal mekah a thla mal ang pawha chhiah lakluh a hniam deuh tum awm loin a kang deuh char char zawk a. Chhiah tlingkhawm atanga state-in sum a hmuhna pui ber chu integrated GST niin, hei hi sumdawng ho angten state pawn atanga bungrua an lakna atanga chhiah (GST) lut, central leh state-in an insem leh thin a ni a; RBI kaltlangin central hian state chan tur hi thlatin ni 27 emaw ni 28 velah a pe chhawng ve leh thin tih an sawi a ni.
Zawhna chhangin, tunhma ngaihtuahin tunhnaiah chuan mipuiin chhiah pek an ngaipawimawh ve tawh a, tunhma chuan professional tax takngial pawh a hmuna kalchilh ngai khawpa a pe tur ten pek harsa an tih thin a ni tih an sawi. Professional tax pek ngai, pe duh lo reng te chu dan tlawhchhan hmangin an chungah hma a lak theih a, an chawi tur pangngai let chhiah chawi tir emaw, a tul anga lung in tan thlenga hrem theih a ni tih an sawi.
Taxation-in sum chhunluh tura beiset zat an tlin hnai
