ZPM a sawrkar a nih chuan taxi-a ei zawngten an lirthei leh permit hman theih chin awm sa chu an awlsam zawkna atan ruahmanna thar an siamsak dawn tih ZPM leader Lalduhoma chuan a sawi.
Thawhtanni khan ZPM leader hian Mizoram Taxi Association (MTA) office a tlawh a. Pawl hruaitute nen an inkawmnaah khawvel changkang zelah kan eizawn dan pawh kan thlak danglam ve tial tial a, lirthei hmanga eizawng chhungkua thlah kalzelah lirthei hmang veka eizawng kan tam ve tial tial ta, tiin, eizawnna dangah pawh chu chu kan kalpui ve tan mek tih a sawi. Tuna lirthei permit vawikhat chiah renew theiha sawrkarin a kalpui mek chu AMC inthlan atang tawh khan thlak turinan party chuan an lo aupui tawh a. Kha kha tuna an dinna ngai reng a, an sawrkar a nih chuan he harsatna sukiang tur hian ruahmanna an siam dawn tih a sawi a ni.
“Sum siamna atana permit hman hi tha kan ti lo a, miin eizawnna nghet a neih theihna tur kan ngaihtuah pui ber. Lirtheia eizawngte an lirthei a fit chhung chu replace theih turin ruahmanna siam kan tum dawn,” Lalduhoma hian a ti. Intlanchhawk chungchang erawh a mimalin thutlukna a siam thei loa, an hotute leh helam khawihtu department nen ngun taka ngaihtuah tlan ngai thil a ni tih a sawi.
MLA Lalchhuanthanga pawhin lirthei hmanga eizawng mek leh kuthnathawktute ngaihsak tak tak lo sawrkar zel kan la hrawn nia sawiin, “Tuna kan sawrkar phei chuan kuthnathawktute eizawnna ber bazarpui pawh a sa thar hleithei loa, vawi tam tkan aupui chung pawhin awmzia a awm hleithei lo. ZPM kan sawrkar a nih chuan, ‘kan ti ang’ tia kan lo sawi tawh hi chu tih ngei kan tum dawn a ni,” a ti.