April 20 zana a taxi hman khalhtu vithlumtu Lalfakmawia, Samlukhai khua chu a phu tawk hremna pe ngei turin thuneitute an phut tih Aizawl Two Wheeler Taxi Association chuan an sawi.
Ningani zan dar 8.00 pelh hnu khan two wheeler taxi driver Lalrammawia (24) h/o Lalramsiami, Bawngkawn Aizawl chu Zemabawk Zokhawsang peng bulah a passenger Lalfakmawia, Samlukhai khua nia inchhal chuan chemte in a nakah vit a. A bulhnaia awm ten Greenwood Hospital-ah an hruai nghal a, a hliam hi chhan hman a ni ta lo a ni.
Pawikhawihtu Lalfakmawia hi police-ten an la nghal a. Amah hi Bawngkawna a chhungte bela awm, Aizawl thleng hlim deuh chauh nia sawi a ni. Taxi khalhtu nen hian inhnial-buaina emaw an nei chuang lem lo nia sawi a ni bawk.
Aizawl Two Wheeler Taxi Association (ATTA) chuan thuchhuah siamin, an eizawnpui Pu Lalrammawia hriamhrei hmanga beih a ni leh a, nunna hial a chan chu pawi an tih thu sawiin, Lalfakmawia chet dan chu an demin a thinur thlak an ti a, hetianga rawng taka chetna hi tu chungah mah thleng tawh lo se an tih thu an sawi. Lalfakmawia chungah hian dan angin a phu tawk hremna pe ngei turin thuneitute kan phut tih a sawi bawk.
‘Two wheeler taxi khalha ei zawng Pu Lalrammawia chunga Lalfakmawia chet dan atang hian, kan eizawnna hi a him tawk lo niin kan hria a, hemi kawngah hian thuneitute leh dan kengkawhtuten hma min lakpui turin kan ngen a ni,’ a ti.
Taxi driver vithlumtu hremna phut
![](https://theaizawlpost.org/wp-content/uploads/tap_logo-min-large.jpg)