Aizawl Municipal huamchhunga kawngpuia taxi stand ho chu entha turin Centre For Environment & Social Justice chuan thuneitute a ngen.
Centre For Environment & Social Justice (CESJ) hian Nilaini khan Aizawl Municipal commissioner hnenah memorandum an thehlut a. Aizawl mipui himna leh zahawmna humhim sak tura khawpui chhung tawp lutuk thenfai lama hma la turin an ngen.
An thu thlen zingah Municipal huamchhung veng hrang hranga kawngpui kam, kea kalna (pavement) a chawhmeh zuar zawng zawng, a bulhnai bazar in sak chhunga sawn luh vek; lirthei neiten a dahna in (garage) an nei ngei tur a nih laia kawngpui sira chhun zan zawma lirthei riah thin tihtawp vek; mimal sumdawng /dawrkai motor parking nei lo, an dawr kawta nileng zankhuaa lirthei dah thin titawp turin an ngen a. Vantlang kawngpui chu mi hausaten lirthei hun nan a thlabia an lei chu thil dik lo hulhual a ni, tiin, tihtawp an ngen bawk.
Aizawl Municipal huamchhunga taxi stand enthat vek an ngen a. Taxi permit pek an nih ruala vantlang kawngpui, alkatra luan chhunga eizawn/ sumdawn phalna hi pek nghal an ni em, tih zawtin, pek an ni chuan eng dan hmanga pek nge tih an zawt. Mimal sumdawnna atana vantlang kawngpui hman ngawt chu thil thiang a ni lo, tiin, ‘Mitin hian kawngpui hi eizawnna atan kan duh vek ang. Taxi hmanga eizawngte pek bik hi a dik lo hulhual a. Vantlang kawng niloa taxi an service dan ruahman thuai ni rawh se,’ an ti.
Lirthei neituten a dahna (garage) nei vek tura tih an nih angin, lirthei lei thar registration tih rualin garage neih thu ziahna Local Council hriatpui lehkha Transport authority-ah thehluh nghal a nih laiin, garage nei anga lehkha thehlut, nei si lote chu sawrkar/mipui bum, an registration cancel sak ngei tur an ni tih CESJ hian sawiin, ‘Garage nei anga insawi, nei si lote hian sawkar/ mipui an bum a hnu hmanah vantlang kawngah dan bawhchhiain an lirthei an hung zui a ni,’ a ti.
City Bus tawng lutuk tawh, kawng chho deuha chhe fo mai chuan traffic a ti zam ngun a, nunphung pangngai an tihkhailak tam tawh tih pawh thlenin, lirthei hlui tawh lutuk a nih vanga a meikhu chhuah atanga khu dum ngen ngun chhuah thin zawng zawng tlan tir tawh loh nise, tiin an ngen bawk.