Daily Newspaper

Taylor Swift album thar ‘Evermore’

11

Taylor Swift chuan engmah thawt lawk pawh awm lovin a album thar ‘Evermore’ chu an rama Zirtawpni zanlai khan a tlangzarh thut a, he album thar hi a album hnuhnung ber ‘Folklore unaunu’ tiin a sawi. He album hi hla 15 awmna niin, Haim, Bon Iver leh The National te a thawhpuina hla te pawh a tel.

Taylor Swift hian December ni 13-ah kum 31 a tling chiah a, a album thar pawh hi a kum 31 tlin lawmna ang deuha a tihchhuah a ni a, “Kum 13 mi chauh ka nih lai atangin kum 31 ka tlin hun tur hi phur takin ka lo thlirlawk ve thin, a chhan chu ka lucky number letling zawng a nih vang a ni a, chuvangin tunah hian han barakhaih ve che u ka duh a ni,” a ti a, “Ka pianchamah te min care a, min support a, min ngaihtuah thin a, chuvangin tun tum chu eng emaw ka pe let ve ang che u ka ti a ni! Hei bakah hian holiday season a ni a, boruak a rehin kan lung te pawh a leng leh dawn a, chuvangin he hunpuiah hian keimah ang bawka hmangaih kaltate ngaia lungleng in awm ve chuan hei hi in tan a ni e,” a ti bawk.

‘Evermore’ hi a album pakuana a ni tawh a, he album-ah hian co-writer/producer Aaron Dessner (The National ami) bakah Jack Antonoff leh Bon Iver ami Justin Vernon te pawhin an pui a, hei bakah hian William Bowery hming pawh a lam chhuak bawk.

A album tlangzarh thu hi Twitter-ah puangin, Swift chuan, “Eng nge lo thleng leh dawn ka hre lo. Tunlai chu engmah hi a hriat thiam theih tak tak loh, chuvangin nangni nena min thlunzawmtu pakhat hi ka vuan tlat mai a ni. Chu chu music hi a ni a, a ni reng bawk ang. Chutiang chu ni reng se, ni zel rawh se. Evermore a lo chhuak ta,” a ti.

Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy