Taylor Swift concert movie advance ticket sale-in record a siam

Taylor Swift concert movie advance ticket sale-in record a siam
Taylor Swift-i’n Eras Tour a neiha a concert movie an siam ‘Taylor Swift – The Eras Tour’ chu October ni 13 hian cinema hall-ah an chhuah tan dawn ta a, he film en tum hi an thahnem nghal hle a, cinema hall ticket lei lawk (advance ticket sales) pawh dollar maktaduai 100 a tling a, feature-length concert film-ah chuan advance ticket sales that ber a la ni.
‘Taylor Swift – The Eras Tour’ movie hi ram hrang hrang 100 chuanga cinema hall 8,500 chuangah an chhuah dawn a, tunah hian a film hi an tlangzarh hma hauh pawhin concert film sum lalut tam ber a ni nghal der tawh a, a hmaa he record siamtu chu 2011-a an tlangzarh ‘Justin Bieber: Never Say Never’ kha niin, dollar maktaduai 99 a la lut thei a, he record hi Swift hian a rawn khum nghal der tawh bawk a ni.
Michael Jackson ‘This Is It’ khan khawvel huapin dollar maktaduai 261 a la lut thei a, mahse, hei hi chu concert film anga chiar a ni lo va, an inbuatsaih lai performance chauh dah a ni a, Michael Jackson kha stage-a a perform hmain a thi ta thut a ni.
‘Eras’ hi a tirah chuan US-ah chauh tlangzarh an tum a, mahse, khawvel huapin an ti leh ta zawk a, Taylor Swift hian a ‘Eras Tour’ hi a la kalpui mek tho a, he tour thawh hnihnaah pawh hi nakkum-ah a la nei leh dawn a, chutah chuan South America, Australia, Asia, Europe leh US te pawh a hrut leh dawn a ni.
‘Taylor Swift – The Eras Tour’ movie hi darkar hnih leh minute 48 a sei niin, SoFi Stadium, Inglewood, Los Angeles-a August thla chawhma lama a concert-na a ni.
Taylor Swift hian Eras Tour hian ni 146 a awh dawn a, vawi khat concert-ah dollar maktaduai 13 vel zel hmuchhuak angin Pollstar chuan an chhut sak a, chuti a nih chuan a tour chhunga a sum hmuh tur hi dollar tluklehdingawn 1.9 vel a tling dawn a, tunhmain zaithiam tour concert atanga dollar tluklehdingawn la lut tling thei an la awm ngai lo a ni.