Daily Newspaper

Taylor Swift ‘Folklore’ record siamin Billboard 200-ah a No.1

12

Taylor Swift album ‘Folklore’ chu Billboard 200 (albums) chart-ah a No.1 thar leh a, tihian a zawn ni kher lovin kar sarih a No.1 tling ta a, tihian he chart-a a No.1 tawh zawng zawng belhkhawm chu kar 47 a tling ta chiah a, Whitney Houston record lehpelin Billboard 200 chart-ah hmeichhe zinga No.1 ni ngun ber record thar a siam ta a ni.

Billboard 200 (albums) chart hi kar khat (Zirtawpni – Ningani) inkara US-a album hralh tam dan atanga teha chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album hralhna tlukpui te belhkhawm thin a ni.

Folklore hi copy 87,000 hralh lehin, chung zinga copy 56,000 chu album tak tak hralhna a ni a, copy 30,000 chu streaming atanga album hralhna tlukpui (US-ah kar khat chhungin on-demand stream maktaduai 39.8) niin, copy 1,000 chu album-a hla mal hralhna atanga album hralhna tlukpui a ni ve thung.

Tihian he chart-a Taylor Swift No.1 tawh hun chhung belhkhawm chu kar 47 a tling ta a, he chart-a hmeichhe zaithiam No.1 ni rei ber record a siam ta a ni. A hmaa record chu Whitney Houston niin, kar 46 a No.1 thei a, hei hi Swift hian a rawn nihrual hnuah tunkar chart-ah a lehpel a, amahin record thar a siam ta a ni.

A nawlpui thua lakah chuan he chart-a No.1 ni rei ber chu The Beatles niin, kar 132 an No.1 tawh a, an album 19 zet No.1 an kai pui thei a, a dawttu chu Elvis Presley (67) niin, Garth Brooks (52) leh Michael Jackson (51) ten an dawt a, Taylor Swift (47) chu pangana niin, Whitney Houston (46), The Kingston Trio (46), Elton John (39), Fleetwood Mac (38), The Rolling Stones (38), Harry Belafonte (37), The Monkees (37), Prince (35), Adele (34), Eminem (34), Eagles (30) leh Mariah Carey (30) ten an dawt ve leh a ni.

Pop Smoke No.1 album hlui ‘Shoot for the Stars Aim for the Moon’ chu copy 75,000 hralh lehin No. 2-ah bawk a la awm a, kar kalta No.1 YoungBoy Never Broke Again ‘Top’ chu copy 63,000 hralh lehin No.1 atangin No.3-ah a tawlh ve thung.

Alicia Keys album thar ‘Alicia’ chu copy 62,000 hralhin No.4-ah a debut a, hei hi a top 10 album pariatna a ni. He album hi March ni 20-a tlangzarh a tum tawh kha a ni a, mahse, coronavirus avangin a sawn hla ta a, 2016 hnu a a studio album tlangzrah leh hmasak ber a ni bawk.

Juice WRLD No.1 album hlui ‘Legends Never Die’ chu copy 51,000 hralh lehin No.3 atangin No.5-ah a tawlh ve ta bawk.

Rappers Moneybag Yo leh Blac Youngsta album intawm ‘Code Red’ chu copy 40,000 aia tam deuh hralhin No.6-ah a debut a, Moneybag Yo tan a album chart top 10 kai thei pahnihna a nih laiin Blac Toungsta tan erawh a top 10 album hmasa ber a ni ve thung.

Keith Urban album thar ‘The Speed of Now, Part 1’ chu copy 40,000 hralhin No.7-ah a debut a, hei hi Urban tan a top 10 album pariatna a ni.

Broadway cast recording Hamilton: An American Musical chu copy 39,000 hralh lehin No.5 atangin No.8-ah a tawlh a, chart No.1 hlui Lil Baby ‘My Turn’ pawh copy 38,000 hralh lehin No.6 atangin No.9-ah a tawlh ta bawk.

Lil Tecca album thar ‘Virgo World’ chu copy 34,000 hralhin No.10-ah a debut a, Tecca album chart top 10 kai thei pahnihna a ni.

(THE AIZAWL POST – Thalaite Huang)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy