Taylor Swift hla hit ‘The Fate of Ophelia’ chu Billboard Hot 100 (US singles) chart-ah a No.1 a, he chart-ah hian a zawn lovin kar kua a No.1 tling ta a, Swift hla zinga he chart-a No.1 ni rei thei ber a ni ta. Hetihrual hian Ella Langley pawhin a vawi khat nan he chart top 10-a lang thei hla a nei ve ta bawk.
Krismas a zo a, heti lam hla ten chart an chhuahsan leh ta sap sap a, chutiang karah chuan Swift hla ‘Ophelia’ chu No.28 atangin No.1-ah a rawn invawrh leh ta a, tihian he hla hi kar kua a No.1 tling ta chiah a ni. A hmain Swift hla sang ‘Anti-Hero’ nen kar riat ve ve No.1 an ni thei a, tunah chuan ‘Anti-Hero’ hi kalsanin, Swift hla zinga he chart-a No.1 ni rei thei ber a ni ta a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Taylor Swift ‘The Fate of Ophelia’ hian kar khat chhungin US-ah stream maktaduai 18.3, radio airpiay ngaithlatu maktaduai 60.7 leh sales 30,000 nei lehin, hei hi chart-ah a kar kua nan a No.1 pui leh ta a ni.
Taylor Swift hian he chart-a No.1 kai thei hla 13 nei tawhin, heng hla 13 te No.1 hun chhung belhkhawm chu kar 45 a tling tawh a, zaithiam zinga he chart-a No.1 nih reia pariatna a ni ta. Swift hian 2012, 2015, 2015, 2017,2020, 2021, 2022, 2023, 2024, 2025 leh 2026-ah No.1 a kai ta a, kum 11 chhung he chart No.1-ah a lang tling ta a, Mariah Carey tih lohah chuan zaithiam zinga he chart No.1-a a kum anga lang tam ber a ni. Mariah Carey hi kum 22 chhung No.1-ah a lang thei ve thung.
Chart No.1 hlui KPop Demon Hunters soundtrack HUNTRIX “Golden” chu No.25 atangin No.2 a kai thar leh ta a, chart No.1 hlui bawk Alex Warren ‘Ordinary’ pawh No.3 kai thar lehin, Olivia Dean ‘Man I Need’ chu No.36 atangin No.4 a kai thar ve le ta bawk.
Ella Langley “Choosin’ Texas” chuan stream maktaduai 15.7, radio airplay maktaduai 25 leh sales 5,000 nei lehin No.48 atangin No.5-ah a invawrh a, he chart top 10-a a lan vawi khatna a ni.
Kehlani “Folded” chu No.51 atangin No.6 a kai thar leh ta a, Sombr “Back to Friends” pawh No.52 atangin No.7-ah invawrh lehin, Swift “Opalite” chu No.54 atangin No.8 a kai thar leh ta a, Leon Thomas “Mutt” pawh No.9-ah a invawrh thar lehin, Justin Bieber “Daisies” pawh No.10-ah a la awm.
Taylor Swift hla zinga No.1 ni rei ber ‘The Fate of Ophelia’
