Taylor Swift ‘TTPD’ a No.1 leh ta

Taylor Swift ‘TTPD’ a No.1 leh ta
Taylor Swift album ‘The Tortured Poets Department’ (TTPD) chu Billboard 200 (albums) chart No.1-ah a rawn lang thar leh a, a zawn ni lovin he chart-ah hian kar 13 a No.1 tling ta. An tlangzarh hlim atanga No.1 nghal kha niin, kar 12 a zawna a No.1 hnuah kar hnih chhung No.4-a a tawlh a, tunah a kar 13 nan a No.1 leh ta a ni.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Taylor Swift ‘TTPD’ hi 71,000 hralh lehin, chung zinga 59,000 chu streaming atanga album tlukpui (on-demand official stream maktaduai 77.73) niin, album tak tak hralh chu 12,000 a ni a, album-a hla mal hralhna chu chhiar tham a ni lo. Hei hi chart No.4 atangin No.1 a kai pui leh ta a ni.
Chart No.1 hlui Morgan Wallen ‘One Thing at a Time’ chu 64,000 hralh lehin No.6 atangin No.2 a kai thar leh a, Zach Bryan ‘The Great American Bar Scene’ chu 61,000 hralh lehin No.5 atangin No.3 a kai thar ve ta bawk.
Chappell Roan ‘The Rise and Fall of a Midwest Princess’ chu 53,000 hralh lehin No.8 atangin No.4-ah a invawrh a, he chart-a a thlen san ber a la ni. Billie Eilish ‘Hit Me Hard and Soft’ chu 53,000 hralh lehin No.9 atangin No.5-ah a insawn thar ve leh a, kar kalta No.1 K-pop group Stray Kids ‘ATE’ chu 52,000 hralh lehin No.1 atangin No.6-ah a tawlh ve thung.
Chart No.1 hlui Eminem ‘The Deat of Slim Shady (Coupe de Grace)’ chu 49,000 hralh lehin No.3 atangin No.7-ah a tawlh a, Twisters: The Album pawh 44,000 hralh lehin No.7 atangin No.8-ah a tawlh a, top 10 atanga chhuak tawh Charli XCX ‘Brat’ chu 40,000 hralh lehin No.14 atangin No.9 a kai thar leh a, Noah Kahan ‘Stick Season’ chu 39,000 hralh lehin No.10-ah bawk a la awm.