Taylor Swift TTPD-in 6x Platinum a kai

Taylor Swift TTPD-in 6x Platinum a kai
Taylor Swift album ‘The Tortured Poets Department’ chu Recording Industry Association of America (RIAA)-in 6x Platinum certification a pe ta a, hetihrual hian he album hi kumina Apple Music-a album stream nasat ber a nih thu an puang bawk.
RIAA platinum certification hi US-a album emaw hla mal emaw maktaduai hralh theih chin chhinchhiahna a ni a, 6x Platinum a nih chuan US-ah maktaduai 6 an hralh tling tawh tihna a ni. TTPD hi Taylor Swift studio album 11-na a ni a, a tlangzarh atanga thla sarih chhungin 6x platinum hi a kai hman ta a ni.
Taylor Swift hian RIAA 6x platinum certified album paruk a nei tling tawh a, 2006-a a self-titled album ‘Taylor Swift’ bakah 2008-a a album ‘Fearless’ (he album hi Swift album zinga diamond certification nei thei awm chhun a la ni a, diamond certification hi US-a maktaduai 10 hralh theih chhinchhiahna a ni), ‘Speak Now’ (2010), ‘Red’ (2012) leh ‘1989’ (2014) ten an lo kai tawh bawk.
‘TTPD’ hi Apple Music-in an kum tawp chart an tihchhuah tharah 2024-a Apple Music-a album stream nasat ber niin, album of the year a ni a, Swift pawhin Instagram Story-ah, “Ahhhh ka music leh TTPD in lo ngaihthlak thin avangin ka lawm tak zet e!!! Nangni, fan-ten The Tortured Poets Department hi @applemusic-ah TOP STREAMED ALBUM of The Year-ah in hlangkai a ni!!!” a ti a, “Nangmahni avangin Top Streamed Artist ka ni thei bawk e,” a ti bawk.
Apple Music year end chart-ah hian Kendrick Lamar chu a hla hit ‘Not Like Us’ avangin Top Songs of 2024-ah No.1 a ni a, Swift hi top 5-ah langin, a hla ‘Cruel Summer’ chu No.5 a ni a, Post Malone nena an zai dunna ‘Fortnight’ chu No.20 niin, ‘Lover’ chu No.34 a ni a, ‘Anti-Hero’ chu No.47, ‘Down Bad’ chu No.78, ‘You Need to Calm Down’ chu No.81 leh ‘I Can Do It With a Broken Heart’ chu No.82-ah te an lang bawk.