Taylor Swift ‘TTPD’ kar 5 a No.1 ta
Taylor Swift album ‘The Tortured Poets Department (TTPD) chu Billboard 200 (albums) chart-ah a No.1 a, he chart-ah hian a zawnin kar nga a No.1 tling ta. Hetihrual hian Billie Eilish album thar ‘Hit Me Hard and Soft’ chu chart No.2-ah a debut bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui le album-a hla mal hralhna atanga album tlukpui te belhkhawm thin a ni.
Taylor Swift ‘TTPD’ hi kar khat chhungin 3,78,000 an hralh leh a, chung zinga 2,10,000 chu album tak tak hralhna niin, 1,66,500 chu streaming atanga album tlukpui (on-demand official streams maktaduai 216.9) niin, 1,500 chu album-a hla mal hralhna atanga album tlukpui a ni ve thung.
TTPD hi Adele album ‘25’ hnuah an tlangzar atanga kar nganaa kar khat chhunga US-a album hralh tam ber a la ni. Adele ‘25’ hi January thla tir, 2016 khan kar khat chhungin US-ah an tlangzarh atanga kar nganaah maktaduai 1.193 an la hralh thei.
Taylor Swift album hrang hranga Billboard 200 chart-a No.1 tawh te No.1 hun chhung belhkhawm chu kar 74 a tling ta a, soloist zingah e chart-a No.1 ni rei ber a nihna a sawhnghet leh ta sauh a ni. Soloist zinga he chart-a No.1 ni rei lama Swift dawttu chu Elvis Presley niin, ani hi kar 67 a No.1 ve thung. Swift hian No.1 album 14 nei tawhin, Jay-Z nih rualin, soloist zinga he chart-a No.1 kai thei album ngah ber anni bawk.
Billie Eilish album thar ‘Hit Me Hard and Soft’ chu 3,39,000 hralhin No.2-ah a debut a, US-a kar khat chhunga a album hralh tam ber tum a la ni. Eilis hian No.1 album te pawh nei tawh mah se kar khat chhunga album hralh tamah chuan ‘Hit Me ard and Soft’ i a album hmasa ten an pha tlat lo.
Elish album 3,39,000 an hralh zinga 1,91,000 chu album tak tak hralhna niin, 166,500 chu streaming atanga album tlukpui (on-demand official stream maktaduai 193.93) tlingin, album-a hla mal hralhna atangin album 1,500 tlukpui a tling thei bawk.
Tihian chart No.1 leh No.2 te chu kar khat chhungin 3,00,000 chuang ve ve an hralh thei a, tun kum riat chhunga he chart No.1 leh No.2 te kar khat chhunga 3,00,000 an hralh tlin ve ve leh theihna hmasa ber a ni.
Chart No.1 hlui Morgan Wallen ‘One Thing at a Time’ chu 75,000 hralh lehin No.3 a la ni a, Gunna ‘One of Wun’ chu an tlangzarh atanga kar hnihnaah 56,000 hralh lehin No.2 atangin No.4-ah a tawlh a, chart No.1 hlui Future leh Metro Boomin ‘We Don’t Trust You’ chu 48,000 hralh lehin No.4 atangin No.5-ah a tawlh ta bawk.
Chart No.1 hlui Morgan Wallen ‘Dangerous: The Double Album’ chu 45,000 hralh lehin No.5 atangin No.6-ah a tawlh a, Noah Kahan ‘Stick Season’ chu 38,000 hralh lehin No.6 atangin No.7-ah a tawlh a, chart No.1 hlui Zach Bryan self-titled album chu 38,000 hralh lehin No.8-ah bawk a la awm a, chart No.1 hlui bawk SZA ‘SOS’ chu 37,000 hralh lehin No.7 atangin No.9-ah a tawlh a, Benson Boone ‘Fireworks & Rollerblades’ chu 33,000 hralh lehin No.9 atangin No.10-ah a tawlh ta bawk.
Taylor Swift ‘TTPD’ kar 5 a No.1 ta
![](https://theaizawlpost.org/wp-content/uploads/Clipboard01-1138.jpg)