Serchhip district-a khaw 11 chu TB vei awm lohnaa puan a ni a, hemi lawmna hi Nilaini khan District TB Committee chairman, district bawrhsap David Lalthantluanga hoin hman a ni.
An district khaw 11 TB Free Village-a puan an ni leh sawrkar laipui atanga lawmman dawng tura thlan an ni chu a lawmpui tih bawrhsap hian a sawi a. Serchhip district chu TB dona kawngah hma a la tha a, sawrkar laipuiin target a chhawpchhuah an tlin a, khawtlang mipui leh Health department hotute thawhhona thatzia a lang tih a sawi a ni.
Hmalak hmasakna khaw 11 an hlawhtlin ang bawkin, district chhung khaw dangah beihpui thlak a ni zel dawn tih a sawi a. Tuna bronze medal dawngtu khaw 11 pawh silver leh gold medal dawng theia tan la turin a fuih.
Serchhip district-a khaw 11 – Bawktlang, Piler, Hmuntha, Buangpui, Zote South, Sialhau, Khawbel, Neihloh, Thinglian, Vanchengte leh Hmunzawl chu TB Free Village-a puan an ni.
District TB officer report danin, kum 2022- 2023 chhung khan Serchhipah TB vei 53 hmuhchhuah an ni a. Kumin May 10 thleng khan TB vei 22 hmuhchhuah an ni.
TB vei awm lohna khua 11 awm
