Nikum thla thum chhung aiin hemi hun chhung vek kuminah TB vei hmuhchhuah an pung.
National TB Elimination Programme chu kumin atana quarter khatna (January – March) chhunga an hnathawh leh hmalakna thlirletin Thawhlehni khan an thukhawm a. Heta report danin, kumin January leh March inkar chhungin TB rinhlelh mi 3761 endik an ni a. TB vei mi 595 hmuh chhuah an ni. Nikum January leh March inkar khan TB vei mi 420 hmuhchhuah an ni thung.
Kumin 1st quarter chhungin MDR-TB (TB damdawi pangngaiin a tih dam zawh tawh loh) vei mi 38 hmuh chhuah an ni a. TB leh HIV vei kawp mi 57 hmuhchhuah an ni bawk. Nikum hemi hun chhunga TB vei hmuhchhuah zinga he natna avanga thi chu zaa 5 an ni a, TB vei tihdam hi zaa 77 an tling. TB vei hmuhchhuah zingah hian zaa 6 chu zunthlum nei an ni a, zaa 33 chu vaihlo kaihhnawih ti niin, zaa 16 chu zu in mi an ni.
Thutkhawmah hian TB venna chungchang, TB Preventive Therapy lak a pawimawh tih sawi a ni a. An khaka hrik hmuh, Chuap TB vei chenpuite chu TB an vei leh vei loh endik vek a, TB an vei loh chuan TB venna an lak a ngai tih sawi niin, chuap TB khaka hrik hmuhte chuan an chenpuite TB an kaidarh mai a awlsam em avangin an chenpuite hian TB venna an lak a pawimawh tih sawi a ni.
TB venna la duh lo an awm nual tih sawi a ni a. La tura intih luih theih ni lo mah se, hei hian TB kai lo tura a ven avangin chuap TB vei chenpuite chuan an lak ngei a pawimawh tih sawi a ni.
January leh March chhunga district tina TB hmuhchhuah dan:
1. Aizawl – 433
2. Champhai – 24
3. Kolasib – 46
4. Lawngtlai – 27
5. Lunglei – 34
6. Mamit – 5
7. Siaha – 16
8. Serchhip – 10