Tawngtai Bethel Camping Centre-ah ruihtheihthil avanga harsatna nei mi 600 chuang an awm mek a, minister B Lalchhanzova chuan ramin a mamawh avangin an chhia leh tha hriatna hmang a, a der tal pawha felna atanga bul tana nungchang thlak tlat turin a fuih.
TBCC Sakawrtuichhun-ah hian chief minister, Home minister leh Excise & Narcotics minister te ruahmanna atangin room thar – , ‘Josepha Room’ sakna tur sawrkarin a tum a, Central YMA-in a sak hna a thawk. Thawhtanni khan Food, Civil Supplies & Consumer Affairs minister B Lalchhanzova hian a hawng.
Minister hian, ruihhlo avanga Mizoram a rum lai a, Central YMA leh TBCC founder Pu Zohminga te chhungkua in a langsar lo lama rawngbawlna hlu tak an thawk chu fakawm a tih thu a sawi a. TBCC-a awm ruihhloa harsatna tawk mekte fuihin, he ram hian a mamawh avangin chhia leh tha hriatna hmang tur leh, a der tal pawha felna atanga bul tana nungchang thlak tlat turin a chah.
Central YMA president R Lalngheta chuan, ruihhlo laka harsatna tawk mekte chu “drugs addict tura piang bik in ni lo” tiin, an dam leh thei a ni tih hria a, rilru fim nen ngaihtuahna thar hmang turin a chah a; ruihhlo do kawngah ‘hmangaihtu der’ an chhuah thin avangin mipui an mangang thin tih sawiin, kuminah Pathianin boruak thar tha zawk a pek lai hian Central YMA chuan ruihhlo bawiha tang mekte chhanchhuak turin theihtawp chhuah a tum thu tih a sawi. Khawvel damchhung reiloteah midang tana malsawmna ni tura rawn chhuak turin a fuih bawk.
In sak thar hi “Joshepa Room” hi a dung feet 60 leh a vang feet 24 a lian a ni a; choka, inthiarna leh venbuk 2, infiamna tur kawtzawl zau tak a awm bawk. A sakna atan Rs. 13,59,822 sen a ni. Hei bakah hian in dang pahnih sak leh tum a ni.
May 11 thleng khan TBCC-ah hian mi 673 an awm mek.
TBCC-a awm mi 600 velte ramin a mamawh thu hrilh
