Daily Newspaper

Team Rahul ten Congress meeting-ah UPA Minister rualte dim lo

33

Congress Rajya Sabha member tena virtual meeting an neih party President Sonia Gandhi kaihhruaiah United Progressive Alliance (UPA) government a Minister te leh party chief hlui Rahul Gandhi lamhnai te karah inhnialna nasa tak a thleng nia sawi a ni.

Congress party chuan he virtual meeting a thil sawiho emaw te hi thuchhuah emaw a siam chilh miah lo thung.

Law Minister hlui Kapil Sibal chuan party inkaihhruai leh chetdanah zawhna a neih thu sawiin thawhona tha a awm lo nia sawiin ‘inenfiahna’ kalpui ngai a tih thu a sawi chu Rajya Sabha member Rajeev Satav chuan chhang letin UPA-II sorkar kha kum 2014 Lok Sabha inthlana party tichhiaa MP 44 chauh neia siamtu tiin a chhang nia sawi a ni.

Finance Minister hlui P. Chidambaram an Congress te chuan Modi sorkar hlawhchhamna mipui hrilh hriatna kawngah an chak lo lutuk a, hei hi ‘pawl chakloh vang’ tiin a sawi bawk a, hei pawh hi Rahul Gandhi hnaih party general secretary-organisation, K.C. Venugopa chuan a hnial bawk.

Prime Minister hlui Dr. Manmohan Singh pawh virtual meeting-ah hian telin Youth Congress hruaitu hlui leh ‘Team Rahul’ zinga mi Satav an tuna Congress harsatna chu UPA-II nia a puh lai pawhin a awm ve a ni.

Dr. Singh bakah hian UPA Cabinet Ghulam Nabi Azad, Anand Sharma leh Jairam Ramesh te pawh virtual meeting-a hian an tel bawk a. Dr. Singh chuan UPA-II an demna an sawiah mak a ti hle nia sawi a ni bawk.

Member thenkhatin Rahul an ngen
Party chhunga ngelngheh lohna awm mek zelah hruaitu thenkhat Abhishek Singhvi, Digvijaya Singh, Venugopal keh Satav te chuan Assam MP Ripun Bora an party chu Rahul Gandhi an kaihhruai leh rawh se a tih chu an thlawp thu an sawi zui nghal vek bawk.

He meeting hi darkar li dawn neih niin tunlai politics dinhmun bakah Covid-19 nghawng te, economy tlahniam leh China nena inngura te pawh an sawiho a ni.

Pandemic avanga harsatna nasa tak tawh chungchangah Sonia Gandhi chuan Prime Minister hnenah lehkhathawna Mahatma Gandhi National Rural Employment Guarantee Act (MGNREGA) leh Food Security Act te leh a dang dangte hmanga migrant worker te pui tura welfare measure kalpui tura a ngen thu a sawi a.

Congress chief chuan Bharatiya Janata Party te chu harsatna dang China nena buaina te ngaihtuah aiah ‘mipui thlan sorkar tithlu’ ah a puh bawk.

Senior leader Anand Sharma chuan sorkar chuan tunlaia harsatna laka mawhphurtu a nihna pumpelh tumin Parliamentary session pawh ko duh lo luiah a puh bawk a.

Chidambaram chuan Modi sorkar chuan ‘China nena buainaah an che chhe em em chungin leh economny lamah pawh an che chhe em em chungin Congress organisational structure chak lo avangin mipui ngaihdanah an tlahniam chuang lo’ tiin a sawi a.

Hei hi chhang letin Venugopal chuan social media-a digital campaign an neih dan kimchang sawiin Pradesh Congress Committee (PCC) chiefs leh Lok Sabha MP te nena meeting an neih dan te sawiin ‘party organisation hi a chak lo miah lo, theih tawp a chhuah a ni’ tiin a chhang let a.

Bihar leader Akhilesh Pratap Singh chuan Venugopal hi chhang letin ‘Kerala-ah chuan a ni mai thei a, Bihar leh Uttar Pradesh-ah chuan a ni lo’ tiin a hrilh let thung.
August 5 a Ayodhya a Ram Manidir a Bhoomi Puja neih turah Haryana MP Deepender Hooda chuan Congress Working Committee (CWC) chuan Supreme Court thutlukna a pawm thu sawiin mipui rilru tithlep thei dodalna tawngkam a chhuak tur a ni lo tiin a hrilh bawk a.

Senior Leader Ahmed Patel chuan National Education Policy chu uluk taka zirchian ngai a tih thu a sawi bawk a.

Punjab MP Shamsher Singh Dullo chuan ‘para-dropping’ culture a duh loh thu sawiin ‘party workers te frontal organisation a kaisang zel tur kalh’ a chetlak a duh loh thu a sawi.

Punjab MP, Partap Singh Bajwa chuan agriculture kaihhnawih thil pathum sawiin tun hnaia ordinance siam te chu anti-farmer a ti a. BJP te beihna tur truck load khat a awm a, mahse digital mode a tih a theih loh a, Congress ten Covid-19 dinhmun ziaawmnaah chuan chetlak vat kan ngai tiin a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy