Team thar behchhana hlawhtlin inbeisei Alonso
An team headquarters thar Silverstone-a 2023 season-a hman tur Aston Martin F1 car thar AMR23 an phochhuah tumin an driver thar Fernando Alonso chuan he team behchhana hlawhtlinna chan ngei a beisei thu sawichhuakin, kumin atan erawh a la tinzawn ngam chiah lo!
Alonso hian kumina a zawm tak Aston Martin team chu tun vut vutah an champion nghal lo a nih pawhin hma lam huna Formula 1 hnehtu an la nih ngei a rin ngheh tlat thu a sawi.
Thawhtanni khan an factory tharah Aston Martin chuan kumina an hman tur 2023 car an khuhhawng a, car tak hi duhthusamin an la peihchhuak lo a, nipui thawt huna peihfel tur niin, tun season-ah hian an car duan tharah hmasawnna hmuh ngei an inbeisei.
World champion tum hnih ni tawh Alonso chuan race hnehna a chan nual theih a inrin thu leh he team behchhana a driver title pathumna tur a sualchhuah theih a inrin thu sawi chungin, “Tlang takin sawi ila, kumin su su hi chuan a nih hman ka ring lo. Kumin hi chuan hnehna chang turin kan fight dawn tih hi tu hnenah mah ka la sawi thei lo.
“Chuti ni mah se bultanna atan car rintlak tak ka duh a, hun tha kan neih phawt chuan season chawhnu lamah hi chuan duhthusam car kan hnaih sawtin a rinawm.
“Kumin hian hmachhawp tha tak kan bangliam thei a nih phawt chuan nakkum lamah chuan hnehna leh podium beisei thei turin kawng a inhawng tawh ngei ang,” a ti.
Kum 41 mi ni tawh Spanish driver ropui hian a career-a a F1 season 20-na tur a nghak mek a, chu boruakah chuan an car buaipui mekah hma-sawnna tur tam tak la awm thu sawiin, project phurawm tak chu a hma thei ang bera zo fel thei tura theihtawp a chhuah ve tur thu a tarlang tel.
Kum 2020-a Lawrence Stroll-a’n Aston Martin a lei hnu khan he team hian insiamtharna programme an kalpui nghal a, billionaire Canadian busi-nessman hian a sum khawhralna satliah atan team hi a lei lo a, champion nihpui ngei a tum ruh hle niin an ngai.
Team a lei fel hnu khan Stroll hian a hnathawkte chu a let deuh thawa tipungin, staff 800 dawn an nei tling tawh a; factory thar atan sap pawisa maktaduai engngemawzat thehchhuak tawhin, wind tunnel thar atan an hmang nual a; team tha ber ber atangin big-name engineer a chawklut ruih ruih a, an zingah hian Red Bull atanga an sengluh technical director thar Dan Fallows leh Mercedes atanga an thlemchhuah a deputy Eric Blandin an tel nghe nghe.
Season liamta khan car nei chak lo ber dawttu ni chungin Aston Martin-in bul an tan a, mahse, hmasawnna hmu kal zelin, kum a tawp meuh chuan constructors’ championship-ah parukna an luah pha lo chiah chiah a ni.
Alonso team-mate Lance Stroll hi team neitupa fapa niin, kum 24 mi Canadian driver pawh chuan tun season-a an hmachhawp sawi-chhuakin, “Kan tum ber tur chu chawlhkar tina point hmu chho zat zat thei tura mar taka fight a ni dawn a, chutih karah chuan podium pawh kan sual pah dawn a, chu chu tun dinhmun atan hma-chhawp tha tak a ni,” a ti.
Alonso lamah kirleh ila, Aston Martin lama theihna awmin a hneh avangin nikum kum tawp rual khan Alpine a chhuahsan a, team thar a zawm hnuah Spaniard chuan an project kalpui meka rinna a nghah thu leh a kawppui tur Stroll pawhin a tum a hlenchhuah theih ngei a rin ngheh tlat thu a sawi.
Kumin July thlaa kum 42 tling chho ve tawh tur ni mah se season liamta ai khan Alonso hi a lang ‘slim’ zawk a, amah pawhin tun ang reng renga a la fit ngai loh thu sawi chungin chu dinhmun a luah theih chhan chu season hnuhnung liamta pahnih ang lo taka thlasik inbuatsaih hun laia harsatna a tawh loh vang niin a sawi.
Kum hnih a kalbo hnu kum 2021-a Formula One kawtkai a chuanchhuah leh hma khan cycling accident-ah a khabe ruh a sawhtliak a; thlasik hnuhnung berah khan a hmaia plate leh thildang an phumte chu an phawrh leh tih sawiin, a comeback hnuah tun thlasik hi inbuatsaihna pangngai tak a kalpui theih vawikhatna a nih avangin a fit zaih niin a sawi.