Gadwal, Telangana hmuna police election thila duty te chuan truck pawisa fai cheng vaibelchhe 750 phur tlan lai chu lo ti dingin thu te an zawt fiah nghal a, mahse he pawisa fai hi Union Bank ta niin Kerala atanga Hyderabad a pek tur a nih thu thudawnna chuan nimin 19.10.2023 khan a sawi.
Thil nihna chiang zawk hriat chian a nih hnuah truck chu chhuah zalen nghal a ni. He thil thleng hian Telangana-in inthlan a hmachhawn tur vuakveta venhimna leh thil dik lo chhuitute fimkhurzia leh tanzia pholangtu a ni zawk hial a ni.
He thil thleng hi nilaini zan dar 10:30 vela thleng niin election thila police duty te chuan rinhlelh thilah truck lo tlan hi lo ti dingin pawisa fai Rs.750 crore hi an hmu ta a ni, he police te duty-na hmun Gadwal hi dan loa sumdawngte (smugglers) chet hluarna hmun tak a ni bawk a ni. Hemi hnu lawk hian Telangana chief electoral officer Vikaj Raj chuan Union Bank thuneitu te hnen atanga thu dik leh chiang zawk a hriat hnu in truck chu chhuah zalen tur leh a zin kawng te zawh leh turin a ti ta a ni. Chief Election Officer chuan Telangana-a lirthei lut reng rengte hi dan leh thupek kenkawh a ngaih nasat avangin ngun taka endik vek an nih thu a sawi.
Chief Election Commissioner Rajeev Kumar-in Delhi-a Telangana inthlan hun tur a puan hma a Hyderabad a tlawhnaah state election thuneitute hnenah dan loa sumdawngten Goa leh hmun dang atangin Mahbugnagar kal tlangin Hyderabad an rawn lut thin hi lo dang hneh hle turin a lo hrilh tawh a ni.
CEC chuan helai bawr vela police ten pawisa fai an la man tlem lutuk avang hian rilru a nuam lo zawk hial a ni tiin Election Commission chuan opposition te ngenna angin IPS Officers lu ber ber te, Collectors pali leh senior officials te a lo transfer tawh a ni. Election Commission chuan police duty mahni tana hlawkna um miah lo mi huaisen ten thawhlehni zana truck tlan lai kha thil sual ti thei an nih ringin an lo ti ding ta a nih thu a sawi a ni.
Election Commission tana Telangana Police nodal officer Sanjay Kumar Jain chuan thil chiang zawk sawifiah in,”Pawisa phur truck khan road block a lo thlen khan Gadwal police tanpuina dil nghal a ni a. Kan uisathiamten an han endikin pawisa tam tham tak an hmu ta a, documents pawimawh te zir chiangin bank leh RBI te pawh be nghalin thil nihna chiang tak kan hriat hnu ah Gadwal police duty te hriatpuina in truck chu Hyderabad lam panin chhuah zalen a ni ta a ni”, tiin a sawi.
Hetih lai hian dan phal loh a pawisa fai an man hi cheng vaibelchhia 165 a ni a, bungruaah hian zu, damdawi, rangkachak leh tlereuh thil te an ni.
Rangkachak, Lunghlu leh metals an man te hi a vaiin cheng vaibelchhia 62 hu vel niin pawisa fai an man hi cheng vaibelchhia 77 vel a ni.
Telangana-a Election Duty ten Rs. 750 Crore phur motor man
