Civil Supplies and Irrigation Minister N. Uttam Kumar Reddy chuan Congress sorkar chuan an thutiam ang ngeiin LPG cylinder Rs 500 leh buhfai Rs 500 a quintal khat pek chu a rang thei ang berin an kalpui tur thu a sawi a. An thutiam paruk te chu an sorkar atanga ni 100 chhungin an tihhlawhtlin tur thu a sawi.
Mahalakshmi scheme hmanga gas cylinder Rs 500 pek dan tur ruahman mek a ni a, sorkar chuan scheme tha taka kalpui theih nan system thar a siam dawn a ni. He scheme avanga state-in kum khata a sum sen tur chu Rs 3,000 crore atanga Rs 4,000 crore vel a ni ang.
Capt. Uttam Kumar Reddy chuan Civil Supplies department officials te nen inhmuhkhawmna nei nghalin State mipui 2.9 crore te tana department chuan pawimawhna a neih thuk thu sawiin a bik takin public distribution system hmanga mirethei zawkte an rawngbawlsakna chu a pawimawh zual tiin a sawi a.
State chhungah food security card nei 89.9 lakh an awm a, dilna thar la tihfel loh 11.02 lakh a awm bawk a. Cardholder ten a thlawnin buhfai 6 kg an dawng a, Centre-in Pradhan Mantri Garib Kalyan Anna Yojana hnuaiah 5kg a pe a, State-in 1 kg a pe thung.
Cardholder 11 per cent vel te chuan an ration card chu an hmang lo tiin a sawi bawk a, he mi chungchang hi Chief Minister A. Revanth Reddy a sawipui tur thu a sawi bawk a. Hei bakah hian Centre leh State sorkarin buhfai an pek 90% chu eitlak loh a nih avangin beneficiary te chuan an hralh leh mai thin a ti a. “PDS hmanga mirethei te hnena buhfai a thlawna sem thil tum ber a hlawhchham a ni,” tiin a sawi bawk.
Civil Supplies Department official te chu ration card holder te hnena buhfai sem quality enfiah turin a ti bawk a. “Mirethei te hnena buhfai sem eitlak a nih loh chuan a tum a hlawhchham nghal a ni,” tiin a sawi bawk.
Capt. Reddy chuan sorkar hmasa Bharat Rashtra Samithi (BRS) te chu Civil Supplies Corporation financial health tichhe vekah a puh bawk a. BRS sorkar khan corporation chu sum lamin a pui tha duh ngai lo va, chuvang chuan agency pawn atangin loan an lak phah a ti bawk a. Chumai bakah Civil Supplies Department chuan leiba Rs 52,067.03 crore a nei mek bawk a, heng atanga department in interest a pek tur ringawt pawh Rs 3,645 crore a tling a ni a ti bawk.
Telangana Civil Supplies Corporation chuan Centre in subsidy a release duh loh avangin Rs 5,226 crore a hloh a, MSP operation vangin Rs 6,222 crore a hloh bawk a. Centre-in Rs 4,246 crore a batsak bawk tia sawiin Union Minister Piyush Goyal hmua a sawipui tur thu a sawi bawk.
Telangana sorkarin thutiam tihhlawhtlin tum
