June 11, Pathianni zan khan French Open 2023 mipa final khelh a ni a. Novak Djokovic chuan set hloh lova a khingpui Casper Ruud hnehin, Roland Garros-ah a vawi thum nan a champion. French Open-ah a champion vangin Djokovic hi mipa lamah Grand Slam-a champion ngun ber niin vawi 23 a champion a, thawhtanni atang khan ATP Ranking-ah World No. 1 a ni leh ta bawk.
Final chu
Court Philippe Chatrier-a mipui khar hmuk hmaah Novak Djokovic leh Casper Ruud ten hmuhnawm takin bul an tan a, set khat la turin darkar khat leh a chanve zet khelh a ngai nghal a, entute mit a tlai nghal hle. Set khatnaa hmuhnawm leh ropui ber chu Djokovic come-back turu zet mai a ni.
Clay Court-a hnuhma nei tha tak Casper Ruud an bul a tan tha viau a, set khatna tir lamah break a nei nghal. Hma taka break a neih hmangin 4-1 in hma a hruai a, awlsam takin set a la tura ngaih a ni hman. 1-4 zeta a hnufual laiin Djokovic a khel tha lova, error a ngah viau. Kum naupang zawk Ruud a khel tha viau bawk si a, Serb hian set khatna a hloh ngei tura ngaih a ni hman.
Set khatnaah a hloh ngei tura ngaih a nih laiin Djokovic a er let a, player ropui leh tlo bik a nihna lantir nawn leh. Break a nei let a, a khel tha tulh tulh bawk. Game 6 ve ve an lak hnuin tie-break khelh a ni a, tie-break-a Djokovic ropuizia kan hmu nawn leh a, tihsual nei miah lo, awlsam takin set la tura a mamawh point a hlawhchhuak a, set khatna a la.
Set khatnaah darkar khat chuang fe hun an hmang a, thahrui nasa tak an sen vangin set hnihnaah game a dul deuh ruih a, Ruud a chau tan. Djokovic hian a tum ang ngeiin a khingpui hi a game-ah a hruai lut a, set hnihnaah a chungnung ta viau. Hma taka break a neih chhawr tangkaiin set hnihna chu Nole hian awlsam takin a la a, record thar siam a hnaih leh zual sauh.
Set hnih a hloh zawn hnuin Ruud-a’n set lak ngei tumin tan a khawh a, set thumnaah a khel tha chho ve leh hret. Set thumna tir lamah Djokovic-a’n break theihna hun remchang a nei leh a, a chhawr tangkai thei bik lo. Inhnehtawk takin game an inlakchhawk zak zak a, 5-5 a ni. Game nga ve ve an lak hnuin boruak sangah rilru huaisen leh fit chungchuang Djokovic bawk a ropui nawn leh a, hun pawimawh takah break pawimawh tak a nei. Break a neih vangin 6-5 in hma a hruai a. A serve hum zuiin hnehna pawimawh tak a chang a, 7-6 (7-1) 6-3 7-5 a hnehna changin, French Open-ah a vawi thum nan ropui takin a champion zui ta a ni.
|ha chungchuang Djokovic
Serbian pa huaisen, khawvela fit ber tih ngam hial tur Novak Djokovic hi Tennis player awm tawh zawng zawng zingah thiamna (Skill) nei tha ber leh tlo ber ang hiala ngaih a ni thin. Tennis-a inelna lian Grand Slam hrang hrang pali-ah vawithum chin champion vek thei hmasa ber leh awmchhun a ni a. ATP Masters-ah champion kim vek thei awmchhun a ni bawk. Grand Slam-a champion tam ber a nih bakah World No. 1 ni rei ber a ni tel bawk a, tha chungchuang tih loh rual a ni lo.
Djokovic hian tu pawh hmachhawn se a khingpuite a zir chak em em a, an thiam zawng leh an thiam loh zawng a hriatsak zung zung thin. Tu pawh hmachhawn se set khatnaah a khingpuite zir chian nan a play kual vak a, a tum lawk ang ngeiin set khat a zawh meuh chuan an khingpuite chakna lai leh chak lohna lai a duh angin a hrechiang hman thin. Tichuan, inringtawk taka khel zuiin a chak leh nge nge thin.
World no 1 hlui Andy Roddick chuan ti hian Djokovic chungchang a sawi. “First he takes your legs… Then he takes your soul”. Roddick thusawi hi Lusei tawng chuan ‘A sawp chau hmasa zet ang che nga, i thinlung a hnehsak zui leh nghal ang che’ tihna ang a ni. Chumi awmzia chu Djokovic hian a khingpuite a sawp chau hmasa te te a, a sawp chauh zet hnuah a duh ang thalin a tir kual a, a duhna lamah hnukin, a hneh zui ta thin a ni.
Pathianni thlenga World No. 1 la ni Carlos Alcaraz kha thahrui nei tha zet mai, a kum ala naupang a, a fit turu a ni mai lova, Tennis a thiamin a vuak a na em em bawk. Chuti khawpa tha a nih vang chuan semi-final-ah Djokovic a hneh a rinawm viau a, French Open champion thar ni tura rinkai a ni. Heti khawpa player tha, tunlaia khel tha em em Alcaraz hi Djokovic hian a lo thlau dai a, a sawp zui ta hrep.
Semi-final set khatnaah Djokovic hian Alacraz hi a tlankualtir char char a, set la zawkah a tang bawk nen kum 20 mi a Alcaraz a chau tan der. Alcaraz hian set hnihna la ve bawk mahse Djokovic a hmachhawn vanga tension sang lutuk zo lovin a tha a chat a, set thumna leh set linaah game thum bak a la thei tawh lova, a tlawm chiang han han hle. Hei hi Djokovic that bikna leh a chungchuanna chu a ni. A khingpuite a zir chak em em a, an chak lohna lai atanga chhu chatin, a hneh mai thin.
Grand Slam-a champion ngun ber Djokovic
A thinchhiat em vangin Djokovic hian boruak sangah beisei phak loh chang neiin, final-a tlawm khut chang nei bawk mah se kum 2023 a nih meuh chuan Grand Slam-ah vawi 23 champion in, mipa lamah Grand Slam-a champion ngun ber a ni ta hial.
Grand Slam-ah vawi 23 champion tling turin Djokovic hian kawng thui tak a zawh. A ropuina Australian Open-ah vawi 10 zet a champion tawh a. Grand Slam pali zinga ngaihhlut hlawh ber Wimbledon-ah vawi sarih zet a champion tawh bawk. July thlaa tan tur Wimbledon 2023-ah a champion a nih chuan Djokovic hian Wimbledon-a champion ngun ber Roger Federer record a nih rual ang. US Open-ah vawi thum a champion tawh a, Rafael Nadal-a ropuina French Open-ah vawi thum a champion tawh bawk.
A thiamna, a paukhauhna leh a tlo dan enin Djokovic hi Grand Slam-ah a la champion belh theih a rinawm. Big Three zinga pakhat Roger Federer a chawl tawh a. Grand Slam-a vawi 22 champion tawh Nadal chu hliamin a tibuai a, a hma lam hun a chiang lo viau bawk. Hliamin a tihbuai nasat vangin Nadal hi ranking-ah pawh a tlahniam chak viau a. June 11, Thawhtannia ATP Ranking tihchhuah tharah point 445 hmuin 133-na daihah a awm. Nadal hian kum 2024-ah Tennis chawlhsan a rilruk bawk. Heti a nih vang hian Djokovic hian Grand Slam-a champion ngun ber ni chungin Tennis a chawlhsan a beiseiawm leh zual viau.
Tennis player zingah Grand Slam-a champion ngun ber chu Margaret Court niin vawi 24 a champion tawh a. Margaret Court nihrual turin Djokovic hian vawi khat champion chiah a mamawh tawh. A thiamna mual Wimbledon leh Australian Open-ahte a la inlan leh ngei a rinawm a. Mipa leh hmeichhe zingah Grand Slam-a champion tam ber ni thei tura ngaih a ni tel bawk.
Zin kawng hautak
Mipa lamah Grand Slam-a champion ngun ber ni turin Novak Djokovic hian zin kawng hautak zet mai a zawh a, Covid 19 hripui leng a tuar nasa em em bawk.
Pa luhlul ve tak Djokovic hian Covid 19 hri danna a la duh lo. Hri danna a lak loh vang hian a tuar zui hle nghe nghe. Covid 19 vaccine a lak loh vangin vawi kua zet a champion tawhna Australian Open khelh phalsak a ni lo va, Australia ramah kum thum chhung zin phalsak a ni lo hial bawk. Australian Open 2022 a hmachhawn theih loh laiin he hmunah amah la hneh ngai lotu Nadal a lo champion a, chu chu a zin kawng tihautak leh zualtu a ni zui ta bawk.
Australian Open a hmachhawn theih loh bakah champion lai a nihna Wimbledon 2021 chu cancel a ni ringawt a, US Open khelh phalsak a nih loh bawk vangin Nole hian Nadal-a ropuina French Open chiah hmachhawn tur a nei.
Kum 2022 khan French Open leh Wimbledon chiah a hmachhawn thei a. A champion na Wim-bledon-ah Ranking point hmuh tur tihbo a nih vangin champiom ber hi ranking-ah a tlahniam nghal duai. US-a inelna zawng zawng a hmachhawn theih loh bawk vangin ranking lamah a hniam zual zel. A hniam lutuk loh nan kum danga a khelh ngai loh inelna tenau te te khelin point a khawl keuh keuh a, kum khata chetha zual pariatte inelna ATP Finals khel turin a tling hram a, a champion zui ta hial bawk.
Hlim ni kawl eng
Covid 19 vanga inelna lian tak tak a hmachhawn theih loh hnuin hripui a kiang a, khawvel intheh vengin Djokovic-a tan ngei pawh hlim ni kawl a lo eng ve leh ta.
ATP Finals 2022-ah champion in, he inelnaa champion ngun ber Roger Federer record a nih rual a, hun chhinchhiah tlak a tawng. ATP Finals-ah a champion hnuin thu lawmawm dangin a deng zui leh a, Australia sorkar chuan an hremna hlipin Australian Open 2023 hmachhawn an phalsak. Australian Open 2023-ah a vawi 10 nan champion in Grand Slam-a Nadal champion zat a nih rual a. French Open-ah ropui taka champion in, Grand Slam-a champion ngun ber record a siam ta hial a ni.
GOAT a ni em?
French Open-ah a champion chiah khan Novak Djokovic hi Tennis player piang tawh zawng zawng zinga ropui ber GOAT ah ngaih a ni nghal thup. A hnuhma hnutchhiah hrang hrang enin GOAT nih hi a phu viau bawk.
Khawvelin Tennis GOAT ang hiala an ngaih Djokovic hi ‘GOAT i ni em? tih zawh a ni a. “Hetiang chungchang sawinaah hian ka inhnamhnawih duh lem lo va, mi dang sawi turah ka dah mai. Sulhnu ropui hnutchhiah turin ka bei a, ropui ber tia insawi tur ka ni lo. Chu lam chu mi dang sawi tur a ni”, tiin a chhang.
“Ka naupan lai chuan engtikah emaw chuan Wimbledon champion niin, World No. 1 te ka la ni ve ang tiin ka suangtuah ve thin. Tunah chuan he hmun hi ka thleng ta. Naupang duhawm tak takte te pawhin in hma lam hun tur tha takin insiam thei, siam rawh u”, Champion trophy a lak hnuah fuihna thu Djokovic hian a sawi bawk.
Tennis-ah ‘Big Three’ tia sawi mai Roger Defeder, Rafael Nadal leh Novak Djokovic te zingah kum naupang ber Djokovic hian tan a hlawh lo ber a. Federer leh Nadal te angin ngainat a hlawh zo lo. A thinchhiat bakah player ropui pahnihte a hneh thei riau mai bawk si a, tan a hlawh khat viau a. Auh el a hlawh ngun viau nghe nghe. Chuti chung chuang huaisen takin hma lam a pan lui tlat a. Vana Pa ang maiin zaidam a zir a, a inthunun thei ta viau bawk nen a champion ta zel mai a. Federer leh Nadal tantute tan ngei ngei pawh fak ngei ngai turin hlawhtlinna ropui a chang ta hial a ni.
Djokovi ropui zual em emna chu a hun laia player ropui leh langsar tak tak lakah record a nei tha zawk deuh vek mai hi a ni. Federer leh Djokovic vanglaia chhawrchhuak a nih vangin vanduai tih ni thin mah se amah vangin player dang an vanduai ta zawk.
Tennis lal thar NOVAK DJOKOVIC
