2023 inthlana party-te inbeihna turah tha duh leh duh lo an indo dawn tih ZPM working president K Sapdanga chuan a sawi.
Thawhtannia ZPM party office-a inkhawmah K Sapdanga chuan politics inthial mekah party lian pahnihte an kal ngaiin an kal anga, ZPM party chu kalphung tharin an kal thung dawn nia sawiin, “Sum tam tak seng chung pawhin kum khat daih kawng takngial pawh kan siam hleithei lo hi a pawi hle. Kan hmaa inthlan tur hi corruption hi la hluar zel rawh se, ti leh, corruption hi um tawm ni rawh se, ti pawl; kan ram hi chhe zel mah se a pawi lem lo, ti leh, kan ram hi lo tha ve tawh rawh se, ti pawl; thatchhiat inzirtir zel pawl leh taimak inzirtir pawl indona a ni dawn,” a ti.
Kalphung thar mipui sawrkar din chu ZPM thupui ber a nih thu leh ZPM anga inthlanpui vawi hnihna hmachhawn turin an inbuatsaih mek thu te ZPM hruaitu hian a sawi. “A tum khatnaah kha chuan pawl ding thar kan nih avangin thil fel tawk lo tam tak a awm a, party pawhin hmasawn zelin kalphung thar mipui sawrkar din turin nasa lehzualin kan inbuatsaih a ni,” a ti.
MLA inthlan turah hian ZPM chu an thawkrim ber a ni tih chu Zoram mipuiin an hriat dan a ni tur a ni, tiin, mipuiin an thawhrimna an hmuh a ngai a, chumi tur chuan an party-a awm zawng zawng inbuatsaih a tul tih a sawi a ni.