“Vawiin hi ni thar a ni a, ni eng mawi tak leh beiseinaa khat a nih kan beisei,” tiin kum 42-a upa Pita Limjaroenrat chuan reporter-te hmaah Thailand prime minister ni thei dinhmuna a din hnuah a sawi.
Pita party Move Forward te chu Thai te chuan danglamna siamtu tur angah ngaiin hneh takin an thlang tling a. Voters te chuan kum sawm dawn army thlawp rorelna chu hnawlin party dang zawngte aiin Move Forward te chuan vote an hmu hnem zawk a. Chu chu tum tam tak sipai tena sorkar an paihthlak tawhna ramah chuan hlawhtlinna turu tak tling a ni.
“Hun a inthlak danglam tawh a, tun hi hun tha chu a ni” tiin Pita chuan Bangkok-a party headquarter-ah a sawi a, inthlan neihah Bangkok bikah pawh seat 33 awmah seat 32 an la thei hial a ni.
Thailand-ah hian sorkar siam tura inpuahchah mek a ni a, inthlanah chakna chang mah se Thailand military te chu kingmaker an la ni tho tho thung a. Mahse, inthlana chakna an chang hrim hrim chuan Pita leh a party te chu kum tam tak military rorelna hnuaia awm tawh thalaite chuan inthlak danglam an duhzia a pholang anga ngaih a ni.
Pita hi kum 2019 khan parliament member atana thlan niin chutih la chuan Future Forward Party a ni a. He party hi army te na taka sawiseltu billionaire Thanathorn Juangroongruangkit din a ni a, kum 2019 inthlanah khan an che tha hle a, Thai politics-ah inthlak danglam ngiat an ni.
Mahse a kum leh lawkah Future Forward te chu puhna hrang hrangah thiamloh chantirin thiah luihtirin an ni a. Thanathorn pawh MP atanga disqualify zui niin he mi hnu hian Move Forward chu din zui niin Pita chu leader thar a ni ta a ni.
Future Forward te thiah tura tih a nih khan Thailand-ah mi sang tam tak ten lungawilohna lantirin constitution siam that ngiatin lungawilohna kawtthlerah an lantir a, inthlan that ngiatin sorkar sawiseltu right activists te laka hleilenna tihtawp an ngiat bawk.
Inthlak danglam duhna nasa tak chuan Move Forward te chu tihmasawn zelin an lian zui zel a. Pita ngei pawh Thai parliament a ‘rising star’ tia sawi thin niin a party-in sipai tena politics-a thuneihna sang tak an neih thiah leh monarchy thiltihtheihna tihhniam a aupuina chuan ngaihzawn a hlawh hle a ni.
Constitution siam thata military regime hnuaiah Thailand-in kum sawm chuang a hloh mek tawh ata khaichhuah a duh a sawi chuan thlawptu a ngah a ni.
April thlaa Bloomberg tena interview an neihah Pita chuan Thailand-in a ngaih pawimawh tur a tih chu ‘demilitarise, demonopolise leh decentralise’ tiin a sawi a.
Move Forward te chuan Thailand in lese-majeste laws a neih te chu nuaibo an duh bawk a. “Parliament-ah kan thiat ang a. Parliament ah ngei hian monarch te leh mipui tena kal zel dan tur leh inzawmna neihah sawihona puitling leh langtlang zawka neihna tur kan kalpui ang,” tiin a sawi.
Pita hi Thai family politics a inhnamhnawih hausa tak chhungkua atanga chhuak a ni a. A pa chu agriculture ministry-a adviser niin a patea pawh PM thin Thaksin Shinawatra kaihza vengtu pawimawh a ni bawk.
New Zealand-ah lehkha zir tura thawn a ni a, hetah hian politics a ngaihven tan thu a sawi a. “New Zealand-ah thawn ka ni a, chutah chuan TV channel pathum kan nei a. Australian sopa opera emaw parliament-a debate emaw zawk zawk entur a awm” tiin Thai YouTube proframme Aim Hour-ah kumin February khan a sawi a.
Pita hi Bangkok-a Thammasat University atangin finance a bachelor’s degree nei a ni a, Harvard University atangin public policy-ah master a nei bawk a, Massachusetts Institute of technology atangin MBA a zo bawk.
Amah chu “American product of public policy schools” tiin a insawi hial a.
Sumdawnnaah bul tanin a pa sumdawnna rice bran oil company a enkawl ren rawn a, chumi hnuah ride-hailing company Grab Thailand executive director a ni leh a. Chutima Teenpanart, Thai actress-model nen inneiin kum 2019 khan an inthen thung a. Tunah kum sarih mi fa Pimpim neiin a fanu hi Move Forward rally neihnaah te a hruai thin.
Inthlanah Move Forward te chuan chakna an chang a ni thei a, mahse, Pita chu prime minister a ni ngei dawn tih a chiang chuang lo. Prime Minister tur chu military te ruat Senate leh Lower House te thlan tur a ni tlat.
Ruling establishment ten inthlan result pawisa lovin chet an la mai ang em tia zawhna pawh Pita chuan hlauhthawnna a neih loh thuin a chhang thung a. “Inthlan result-ah chiang takin a lang reng a, mipui duh dan zahlohna chuan sawhkhawk a nei thui dawn lutuk. Thailand mipui ten an remti dawn lo,” tiin a sawi.
Move Forward te hian seat 151 an la a, mahse parliament-ah majority an pha lo thung a, mahse, beisei phak baka che tha tia sawi an ni.
Party lian ber pahnihna Pheu Thai te nen coalition sorkar siam turin inremna an siam der tawh a, anni bakah hian opposition party tenau pali te chu an tel dawn bawk a. Sorkar siam turin majority an nei chiang hle tawh a ni.
“Thailand mipui ten an duhna tarlanna an nei tawh a, prime minister ni turin min pawm emaw pawm lo emaw ka inpeih e,” tiin Pita chuan a sawi.
Mahse, Thailand hian militarry drafted constitution la hmang tlatin senate ah military ruat MP 250 lawih an la awm a, chung mite chu prime minister thar vote tura vote nei an ni bawk si a ni. Heng senator-te hi Prime Minister Prayuth Chan-ocha ruatte vek an nih avangin Move Forward kaihhruai sorkar a pian an remtih rin a ni lo va, chutiang a nih chuan Thailand politics chu a buai zui zel dawn thung a ni.
“Ram dangah chuan party lian ber pahnih inzawm in lower chamber ah seat zahve aia tam an neih chuan sorkar siamtir mai tur an ni,” tiin Thitinan Pongsudhirak, Chulalongkorn University chuan a sawi a, “Mahse, Thailand-ah chuan referee agencies a awm tlat a ni,” tiin sipai chungchang a sawi.
Thailand-ah Move Forward ten sorkar siam ngei tum
