Thailand leh Cambodia inbei, Trump-a’n inrawlh tum

Thailand leh Cambodia inbei, Trump-a’n inrawlh tum
Thailand leh Cambodia chuan laipui leh rocket hmanga civil mite inkahsakah an la inpuh chhunzawm zel a, hetih lai hian US President Donald Trump-a chuan inrawlh a tum thu leh kumin kum tira inkahhai a puanpui chu a taka kalpui theih dan dappui a tum.
July thlaa ni nga chhung an inrina km 817 huang chhunga an buai hnua an tharthawh lehah hian hmun tam takah inepna a thleng a. An indo hmasak hi kum tam tak chhunga an intihbuai nasat ber tum niin Trump-a’n ram pahnih hruaitute biaa titawp tura a ngen angin an titawp.
Asian chhimchhak ram hi Thawhtannia an intihbuai thar lehah hian kut thawh hmasatuah an inpuh ve ve.
Trump-a hian Thawhlehni zan (India-a Nilaini zing)-a Pennsylvania-a hun a hmannaah Pakistan leh India leh Israel leh Iran inkar a chin fel thu a sawi hnuah buaina thar pawh hi tihtawp a tum thu a sawi.
“Cambodia-Thailand buaina pawh hi naktukah phone-in ka be leh dawn a ni,” a ti.
Thai sipaite chuan Cambodian sipaite chaka chhut chhiah an duh tih chiang takin an sawi tawh a, Prime Minister Anutin Charnvirakul-a pawhin Thawhlehni khan beihpui an thlak an tawp dawn lo tih a sawi bawk.
Nilaini khan Trump-a thil sawi chungchang an zawh pawhin buaina chu ram pahnih inrawlhna a nih thu a sawi a. “Kan ram hruaitute hian muanna hi tha taka a awm an duh,” tiin Anutin-a chuan thuthar lakhawmtute a hrilh a. “Phone laka mi biak mai anga awlsam a ni lo va, hun insiam tura indil leh thil sawi pawm a ngai a. Chutiang sawihona awm tur pawhin inbuatsaih a la ngai a ni,” a ti.
Cambodian sorkar thupuangtu, Pen Bona-a chuan Phnom Penh dinna chu muanna an duhnaah a la nih reng thu leh an chet dan chu mahni invenna a nih thu a sawi a. Prime minister adviser chuan inbiak an inpeih angin a sawi ve bawk.
Trump-a nena inremna a awm nana beitu, Malaysian Prime Minister Anwar Ibrahim-a chuan Thawhlehni khan Thailand leh Cambodia hruaitute a be ve ve a, thutlukna erawh an siam lo va, ‘hruaitu pahnihte hi boruak tidai turin an inhawng ve ve’ niin a sawi thung.
Thai sipaite chuan Nilainiah khan hmun 16-ah inbeihna a awm niin a sawi a, ramri tawp ve ve pawh a tel tih an sawi a. Cambodian sipaiten BM-21 rocket hmangin an kap a, Surin province-a damdawi in bul fuhin damlo leh thawktute an inthiar chhuah phah niin an sawi.
Drone hmangin bomb leh BM-21 rocket an kap a, ramri bulah tank an hmang bawk a, kum zabi 11-naa din Century Preah Vihear bul, an inepna a nasatna hmunah pawh an inbei niin an sawi.
Cambodian sipaite pawhin Thailand hian laipui, drone leh mortar hmangin chenna in an kap niin an sawi a, F-16 indo thlawhna pawh an ram chung chinah vawi tam thlawkin civil mite chenna bulah bomb an thlak niin an sawi ve bawk.
Ni thum an indo tawhah hian Cambodia-ah nausen telin mi pakua an thi tawh a, mi 46-in hliam an tuar niin sorkarin a sawi a. Thai sipai panga thiin 68 an inhliam niin an sawi ve thung.
Nilaini khan Cambodia hian Thailand-a Southeast Asian Games neih mekah an him nan leh an chhungte ngaihtuahna avangin an infiam mite an ko haw.
Ramri hnaihah mi za tel hmun dangah sawn chhuah an ni a, thenkhat erawh an la awm lui.