Thalai leh zirlaiten company liana
hna an thawh theih dan tur relho
Sawrkar laipui Ministry of Corporate Affairs secretary Deepti Gaur Mukerjee leh officer rualte chuan Mizoram sawrkar hotute kawmin Prime Minister’s Internship Scheme (PMIS) chungchang an sawiho.
Thutkhawm kaihruaitu Labour, Employment, Skill Development & Entrepreneurship minister Lalnghinglova Hmar chuan PMIS thil tum tlangpui sawiin, he scheme kaltlang hian thalai kum 21-24, high school leh a chunglam college leh ITI zirlaiten India ram company lian tak takah internship an tih theihna tur leh chumi hnua an thawh chhunzawm theihna tur kawng dappui tum an ni dawn tih a sawi.
Corporate Affairs secretary chuan thalai tam takin lehkha an zir zawhah hna zawn ngaihna an hre lo thin a, company leh industry lianah thawhna tur leh thawh dan kawng kalhmang an hriat theihnan PMIS hi a pawimawh hle tih a sawi. Mizo thalai, a tam thei ang berin hlawhtlinpui ngei se a duh tih a sawi bawk.
Hmalak dan tur rel niin, zau zawka awareness campaign buatsaih, he thutkhawma aiawh rawn intir Indian Institute of Corporate Affairs, Institute of Chartered Accountants leh Institute of Company Secretaries of India nen thawhhona tha zawk neih, Mizo thalaiten company lian tak taka an thawh theihna tur leh zir chunga an thawh theih dan tur dap nise tia rel a ni.
Mizorama phailam company lian hotute leh mi pawimawh dang an tel a. Nagaland leh Tripura atang pawhin sawrkar hotuten online-in an chhim ve bawk.
Thalai leh zirlaiten company liana hna an thawh theih dan tur relho
