Thalai thi zingah mipa kan tam lutuk chu hnam ralna thlen theitu a ni tih MLA Zodintluanga Ralte chuan a sawi.
Aizawla college 10 zirlai hruaitu inzawmkhawm, Aizawl City College Joint Students’ Union intawhkhawm a hmanpuinaah Congress Legislature Party leader Zodintluanga chuan zirlaite chu nakin lawkah ram hruaitu, sumdawng, kohhran leh khawtlang hruaitu an la ni dawn, tini, “In kutah kan ram hi kawng hrang hrangin a la awm dawn,” a ti a. Thalai thi zingah mipa an tam ta lutuk chu hnam ralna a ni thei, tiin, kum 2021-a Mizorama KTP member thi zat Central KTP chhinchhiah danin 456 a ni a, hmeichhia 70 an thi a, mipa thi 386 percentage chu zaa 84.64 a tling tih a sawi.
Ruihhlo hluar nasa lutuk chu college zirlaiten mahni college-ah theuh bul tan a, tihrem a nih theih nan tang turin City College SU-te chu a chah.
Social media chu a tangkai ang chiahin a hman dan thiam a tul tel tih MLA hian a sawi a. Thil dik leh dik lo finfiah hmasa a, thil thehdarh te, chumi finfiah hmasa loa lo buaipui chiamtu niloin, finfiah hmasa zel turin a chah.
Lehkhabu chhiar tam tura zirlaite chahin, “Social media lama inhmang tak chungin hun awlah lehkhabu a chhiar theih a, hunawl hmang tha turin lehkhabu chhiar uar thar zel ang u. Hei hi kan hnam tan a pawimawh,” a ti.
Zohnahthlakte chu hmun hrang hrangah awm mah ila, kan inunauna hrereng tura chain, “Hmun khatah tunah la luang za lo mah ila, nangni thalaite hian unau kan nihna hi hre zel ang che u,” Zodintluanga hian a ti.
Thalai thi zinga mipa tam lutuk hi hnam ralna a ni thei – Zodintluanga
