Thalaite rual awta an awm loh a, hma an sawn theihna atan hmanrua chhawp sak chu sawrkar tum ber a ni tih deputy chief minister Tawnluia chuan a sawi.Zirtawpni zinga Chite Playground lungphum a phumnaah deputy chief minister chuan sawrkarin thalaite rualawta an awm a hlau hle a, kawng hrang hrangah hmasawnna an neih theihna’n hmanrua chhawpchhuah sak chu a tum ber a ni, tiin, Chite Venga playground changtlung tak din a ni tur pawh chu Chite Veng leh a chhehvel mai nilo, Mizoram thalaiten an hmang tangkai dawn tih a sawi. Veng mipui chu a enkawlna leh tuaihnum zelna kawngah neitu chan chang a, rilru zau tak pua sawrkar thahnemngaih pui turin a ngen a ni.
Tunhnaia Aizawl Smart City hnuaia project hrang hrang lungphum phum a ni chu lawmawm a tih thu a sawi a. Smart City hnuaia project ho chu department pakhata insawrbing a niloa, department chi hrang hrang, an department mila hna thawh ngaite a ni a, heng atan hian a department kaihhnawih ho te nen Committee siam a ni tih a sawi bawk.
Sports & Youth Services minister Robert Romawia Royte chuan sawrkarin football field a siam ho chu mamawhna san lutuk vang a ni, tiin, “Tunhnaiah football field tam tak chu hun engemawti chhung atan book lawk vek tawh a ni a. Hei hian mipuiin kan playground kan chhawr tangkai hle tih a tichiang. Football-in thalai tam tak tan eizawnna a thlen leh footballer-ten an sum siamte ngaihtuahin Mizorama industry lian ber pawlah chhiar loh theih loh a ni,” a ti.
Tunhnai kum reilote chhunga sports mai nilo thildangah pawh infrastructure-in hmasawnna nasa tak a hmu chu a lawmawmin zirchian tham a ni tih Robert Romawia hian a sawi a ni.
Chite Veng playground lungphum phum tak hi Aizawl Smart City hnuaia project pakhat a ni a, cheng vaibelchhia 8.9 senga sak zawh tura ruahman niin, kumin June 30-a sak zawh hman beisei a ni.
Thalaite hmasawnna atana hmanrua chhawp sak hi sawrkar tum ber – Dy CM
![](https://theaizawlpost.org/wp-content/uploads/tap_logo-min-large.jpg)