Thalaiten ngaihtuahna hrisel
nei ang – TJ Lalnuntluanga
Mizo thalaite chu ngaihtuahna dik leh hrisel nei turin a sawm tih minister TJ Lalnuntluanga chuan a sawi.
Ningania Tuipuiral Group YMA inkhawmpui vawi 45-na, Lianpui khuaa neih a hmanpuinaah minister chuan thalaite chu mahni dinhmun mil ang zela nung thiam tur leh mahni neih tawka lungawi thiam turte, ngaihtuahna dik leh hrisel, taimakna leh rinawmna nunpui a, sum awlsam leh dan loa thil tih pawisak lohna hnualsuat turin a chah a. Mahni kutkea ding thei tur leh intodelh thei turte, hnathawh hreh nei loa theihtawp chhuah turte in a fuih bawk.
Environment, Forest & Climate Change minister TJ Lalnuntluanga chuan Tuipuiral huamchhunga Zopui Tlang, Tan Tlang leh Lurh Tlang-a nungcha leh thing leh mau awmte humhalh kawnga hmalak tulna Tuipuiral Group YMA-in a hnena an thlen chu a tul anga enzui a tum thu a sawi.
YMA chu Zofate insuihkhawmna kawnga sulsutu, hnam zia leh nunphung pholangtu leh chhawmnungtu a ni, tiin, thlei bik nei loa mipui hrutrualtu leh khawtlang thlamuantu a ni thin chu fakawm a tih thu a sawi a. Zonun zemawi tlawmngaihna leh a dangte chhawmnun kawngah tanrual a ngai tih a sawi a ni.
Tuipuiral Group YMA inkhawmpui inkhawmah hian ramngaw leh nungcha humhalh kawnga YMA Branch tithate hnenah lawmman sem a ni a. Group huamchhungah hian YMA Branch 23 awminah member 12585 – mipa 6598 leh hmeichhia 5686 an awm a ni.
Thalaiten ngaihtuahna hrisel nei ang – TJ Lalnuntluanga
![](https://theaizawlpost.org/wp-content/uploads/tap_logo-min-large.jpg)