Thaltlang khuaah rialin in 85 tichhia
Lawngtlai district Thaltlang khuaah March 28 chawhnu dar 2.30 vel khan nasa takin rial a tla a, chhungkaw 85-in rial vanga chhiatna hi an tuar a, in 10 chuang chu luah tlak loh khawpin a chhia.
Thudawn danin, kum dangah pawh tun ang hun hi Sangau leh a chhehvelin ruah leh rial vanga harsatna an tawh thin hun a ni a. Inrinnia ruah leh rial thawk hian a bikin Phawngpuitlang bula awm Thaltlang chu a nuai nasa zual tih sawi a ni.
District Disaster Management Authority Lawngtlai hotute sawi danin, in luah zui tlak loh hi 13 a ni a, a denchhiat nasat zual deuh in 28 a ni a, hei erawh luah zui leh theih mai tura ngaih a ni. Thaltlang khua hi chenna in 110 awmna a ni a, rialin tlemte tal a khawih chhiat hrim hrim hi chu in 85 vel nia sawi a ni.
DDMA leh Lai Autonomous District Council hotute bakah Lawngtlai East ialtu MLA-ten silpauline leh mamawh atana hman tur sumfai an thawh nghal a. In chhia avang hian rangva bundle 272 leh silpaulin piece 153 mamawh a ni tih report a ni.
Hetihlai hian Indian Metereological Department (IMD) Aizawl hotute chuan hmarchhak lama chhum chhah hi Mizoram tiamin Pathianni lamah pawh ala cham chhunzawm zel a, ruah erawh hmun thenkhat tih lohah chuan a tla tam lutuk a rinawm loh tih an sawi a ni.
Thaltlang khuaah rialin in 85 tichhia
