Thangram Cultural Meet nei zo
Ronpur Assam-a Thangram Cultural Meet-2026 neih chu Ningani zan khan Art & Culture minister C Lalsawivunga chuan a hmanpui.
Thangram Indigenous People Movement leh Mizo Zirlai Pawl tandhun buatsaih Thangram Cultural Meet-ah minister chuan, Zo hnahthlak peng hrang hrangte kan chenna leilungin min daidang rih mah se, kan inunauna erawh engmahin a then hrang tur a ni lo, tiin, mahni awmna hmun theuhah India khua leh tui tha ni a, khua leh tui tha in a tih tur hrang hrang midangte tana hnawk loa khawsak tum turin a chah.
Cultural meet hman a ni chuan Thangram chhehvela cheng Zofate inlungrualna tha lehzual thlen se a duh tih sawiin, Mizo culture vawngnunga Zonun ze mawi tlawmngaihna, aia upa zahna leh hawihhawmna chhi chhuak zel tura fuihin, “Zofate tana Pathianin a hun ruat a thlen hunah chuan engmah daidangtu neiloin kan la khawsa ho dawn a, chumi thleng thei tura kan awmna hmun theuhah Mizo kan nihna inhrereng chunga mawi taka khawsa ang u,” a ti.
Adviser to chief minister (Political) Lalmuanpuia Punte, MLA pawhin Thangram leh a chhhevela chengte chu Mizoram sawrkarin chuan a lawm tih a sawi a. British hun lai atangin Zofate chu hmun hran hranah thendarh kan ni, tiin, “Insuihkhawm lehna tura ram hruaitu, tlawmngai pawl hrang hrang kaltlanga hmalaknaah hmasawnna hmuh a ni zel hi Pathianin min hriatpui a ni tih a chiang a, a hunah chuan ram khatah inlungrual takin kan la khawsa ho dawn a ni,” a ti.
Thangram Cultural Meet hmanna hi Ronpur Assam a ni a, kum 2021 khan Cultural Meet hi neih a ni lo tawh. Helai chhehvelah hian Chorei, Sakachep, Hrangkhawl, Ranglong, Molsom leh Kaipeng an cheng a ni.
Cultural Meet tawp zan hian MZP president Dr C Lalremruata leh Ronpur khawtlang aiawhten thu an sawi a, MZP Cultural Troupe leh Thangram huamchhunga chengten hnam lam an entir a, zaithiam an zai bawk.
Thangram Cultural Meet nei zo
