Tharum thawhah Congress puh

Chief minister leh Mizoram Kohhran Hruaitute Committee inkawm laiin, CM office-a tharum hmanga luh luih tumah MNF Thalai chuan Congress party an puh.
MNF Thalai Hqrs. thuchhuak chuan, August 9 khan Mizoram Kohhran Hruaitute Committee (MKHC) leh chief minister Pu Zoramthanga te chu an inkawm a. Hetihlai hian chief minister chenna leh office gate bulah Congress party mite chuan tharum hmanga luh luih tumin an lo bei nia sawiin, hei hi Mizorama thil thleng ngai lo leh sakhaw rawngbawltute zah lohna a nih avangin Mizoram mipui hmaa ngaihdam dil turin Congress party an phut tih a sawi.
MKHC leh chief minister hi chawhma dar 11.00 atangin an inkawm tan a, hemi hma zing lamah Congress party hian CM Banla tualah awmze nei loa punkhawm an tum tih hria in, Parliament Fur thutkhawm neih meka ‘No Confidence Motion’ putluh chungchanga MNF leh Mizoram sawrkar dinna pawh CM office atangin hrilhfiah an ni a. MKHC nen an inkawm dawn avangin punkhawm pawh nei lo tura ngen an ni tih MNF Thalai hian an sawi.
Heti chung hian sakhaw rawngbawltute leh CM inkawmna tihbuai tumin punkhawm an huaihawt lui ta tho a, Synod moderator haw tur pawh hun rei tak chief minister gate bulah Congress party hruaitute hian an dang bet tih sawiin, ‘Kristian ramah kan sakhaw rawngbawltute ti thlabar zawng leh tihbuai tuma tharum thawhna hi vawikhat mah thleng tawh lo turin kan duh a. Congress party pawh MKHC leh Mizoram mipui hmaa ngaihdam dil turin kan phut a ni,’ a ti.