Thatna lai inhmuhsak ang – Robert Romawia
A chhe zawng hlira insawi loin, thatna lai inhmuh sak a tha hle tih minister Robert Romawia Royte chuan a sawi.
Ningania Govt. Aizawl North College (GANC) Week kharna a hmanpuinaah Youth Services minister Robert Romawia Royte chuan Mizote chu a chhe zawng hlira in sawi loin, thatna lai inhmuhsak a, infak tawn a, intichak tawn a tul tih a sawi a. A eng zawnga thil thlir thintu ni turin zirlaite chu a chah.
Thalaite ngaihsan zawng (value orientation) danglam chho tial tial chu lawmawm a tih thu a sawi a. Ngaihsan tur dik tak ngaisang a, sual huaa do ngam tur leh dawt hnualsuat ngam turin a fuih a. Mahni thawhchhuaha hlawhtlinna rah chu a thlum bik tih sawiin, retheihna chu hlawhtlinna daltua hmang loin harsatna hrang hrang chu tumruhna petu ni zawk se a duh thu te, retheihnate chu mi hlawhtlinga chherchhuaktu an nih fo zawk thu te a sawi.
Tunlai khawvelah thudik leh dik tawklo thliar thiam a tul tih Information & Communication Technology minister Robert Romawia hian sawiin, “Social media-a inziak naran leh mi thusawi chhawn ringawt awih mai loin, a dik leh dik loh finfiah (fact check) a pawimawh a; mi tana hriat tlak loh information petu ah tang loin, social media hmangsualtu ni lo ang u,” tiin college zirlaite a chah.
Lehkha zir ngawr ngawr piahlamah rilru hrisel na’n taksa sawizawi a tul tih a sawi a. Infiamna chu mihring nuna bet tlat, sawrkar pawhin a a ngaihpawimawh em em a ni, tiin, zirna (education) atan pawh a pawimawh hle tih a sawi. Mizote hnam hrisel leh fit kan nih theihna’n Mizoram sawrkarin hma a la mek tih a sawi bawk.
2022 September 12 atanga hman tan Govt. Aizawl North College ’33rd Annual College Week Closing Function’ hi Students’ Union Leaders (2022- 2023) huaihawt a ni a. Yellow House an champion a ni.
Thatna lai inhmuhsak ang – Robert Romawia
![](https://theaizawlpost.org/wp-content/uploads/tap_logo-min-large.jpg)