Thawhlehni zan Mizo inchai hmuhnawm
Mahindra XUV3XO Mizo Inchai Title Fight 2024 chu nizan khan a hmun ngai LPS Arena, Falkland-ah nulian leh palian inchai title fightr hmanga khar fel niin, nizan inchai result tarlan hman a nih loh avangin Thawhlehni zan inchai kan thlir dawn a ni.
Mizo inchai pate title fight-ah Lalchhanhima (39th AR, Saitual) chuan 20-0-in champion lai B. Lalawmpuia (Saitual) kuta title awm a chhuhsak.
Anni hi thawh 10 turah thawh sarih thleng an inchai a, hliam vangin Awmpuia’n a bei zui thei lo. An inchai chhungin Chhanhima a chungnung hrim hrim a ni.
THAWH 1-NA : Awmpuia’n a nawr chhuak teuh hle a, Chhanhima insiam thain a nawr let a, point hmu lovin an tluan. (0-0)
THAWH 2-NA : Champion lai Awmpuia tuan a rangin thiamna tha tak nei mah se amah aia kg lia rit leh pumraw lian zawk lakah tharum a ngah tawk lo va, a kuai zangthal teuh hle. (0-0)
THAWH 3-NA : Chhanhima a nghet a, tharum ngah zawk a nihna lantirin a la fuh a, a bawkkhupin vawi 10 chhiar thleng a bawhbet. (Chhanhima 10-0)
THAWH 4-NA : Awmpuia’n bawhbet let tum viau mah se point hmu lovin an tluan. (0-0)
THAWH 5-NA : Tha taka inveng tawnin derthawng lovin an hmang tluan. (0-0)
THAWH 6-NA : Tuan rang zawk a nihna chhawrin Awmpuia a che fuh tep a, mahse, Chhanhima a tal chhuak. A tawp dawnah an intauh. (0-0)
THAWH 7-NA : Eng emaw chen hliam vanga bawihsawm a nih hnuah Awmpuia’n an tan rualin a nawr a, bawhbeh ngei tuma a beih luatah Chhanhima’n a nawr let a, dar betin vawi 10 chhiar thleng a bawhbet. (Chhanhima 10-0)
An intauhnaah Awmpuia’n a beng vei lam hnungah hliam na tham tak a nei a, a bei zui thei lo.
Kum 2004 atangin Chhanhima’n inchai a luhchilh a, title fight hnuhnung ber 2022 khan Awmpuia hneh loin champion kawnghren a hloh a, a inkhelh chhunga amah bawhbettu awmchhun a ni.
Chhanlet ngei a tumna puitlinin Thawhlehni zanah a tumpui tum hnih bawhbetin champion kawnghren a lakir a, an inchaina chhuatah a pheikhawk phelhin kum 35 mi Assam Rifles hian rilru khawih takin inchai a chawlhsan tih a puang zui ta a ni.
LAWMMAN : Title humhim zo lo mah se champion lai a nih avangin Awmpuia’n Rs. 50,000 a dawng a; champion chotu Chhanhima’n Rs. 30,000 la mah se a duhthusam tipuitlingin inchai a chawlhsan.
MIZO INCHAI TITLE FIGHT (NUTE)
Champion lai Lalvenhimi (Bethlehem) chuan a kawnghren humhimin thawh nga inchaiah Lalnuntluangi (Kolasib) chu 21-2-in a hneh.
THAWH 1-NA : Tharum leh thiamna nei a nihzia Venhimi’n lantirin a kuai zangthal a, vawi 10 chhiar thleng a bawhbet nghal. (Venhimi 10-0)
THAWH 2-NA : Tluangi’n beiseiawm takin a bei let a, a nawr chhuak. (Tluangi 1-0)
THAWH 3-NA : Bawhbeh a tum luatah Tluangi tan hmun a phet a, Venhimi nawr letin vawi 10 chhiar thleng a bawhbet. (Venhimi 10-0)
THAWH 4-NA : Tluangi’n chak turin hun tha a nei tam tawh lo va, thawh hnih la awmah vawi 10 chhiar thleng a bawhbeh ve ve a ngai. Mahse, a puitlin thei lo va, vawi khat a nawr chhuak. (Tluangi 1-0)
THAWH 5-NA : Venhimi a nghet a, nalh takin Tluangi a theh chhuak. (Venhimi 1-0)
LAWMMAN : Champion lai Venhimi’n champion kawnghren a humhim rualin Rs. 50,000 a dawng a; Tluangi’n title fight hnuhnung ber kum 2022 ang bawkin Venhimi a hneh lo leh a, champion chotuin an dawn zat Rs. 30,000 a la.