Daily Newspaper

Thawhtanni-ah sikul tan hun ngaihtuah dawn

8

Aizawl, September 21 :  India sorkarin September ni 21 atangin zirna inte hawn a phal a, Mizoramah chuan Thawhtanni hian hemi chungchang hi ngaihtuah a ni dawn tih thu dawn a ni.

September ni 19 khan DM&R department chuan sorkar laipuia Ministry of Home Affairs (MHA) lamin zirna in hawn a phal thu hi an puang a, chu thu bawhzui chuan education department-in sikul hawn chungchang hi an ngaihtuah dawn a ni.

“MHA-in sikul hawn a phal tawh a, chu chu mahni state-ah lo ngaihtuah a ngai a, keini pawhin Thawhtanni hian kan ngaihtuah ang. A hma atangin MHA ngaichang chungin a theih ang angin kan ngaihtuah a, zirna in hawn hi rawn phal ta se engtin nge ni ang tiin kan lo inbuatsaih reng,” tiin education minister Lalchhandama Ralte chuan The Aizawl Post a hrilh.

Thawhtanni hian school education department, MBSE leh zirtirtu pawl (association) te thu dawn a, sikul hawn chungchang hi an ngaihtuah dawn tih thu dawn a ni.

“Zirlaite an chawl rei tawh a, an khawngaihthlak a, zirna an tan hi a hun tawh a. Chutih rual chuan an himna leh mipui himna tur ngaihtuah a ngai bawk a,” minister Chhantea chuan a ti a, “MHA guideline thlir chungin, Mizoram tana a that dan tur ngaihtuah a ngai,” a ti.

Sikul khar chhungin a theih ang angin zirlaite’n lehkha an zir theih dan tur ngaihtuah a nih thu leh sikul hawn dan tur ngaihtuah reng a nih thu a sawi a, public examination hmachhawn tur pawl 10 leh pawl 12 ngaih pawimawh zual a ngaih thu a sawi bawk.

“Pawl 10 leh pawl 12 hi public exam tur an ni a, class an tan har hi an tan a tha lo a. Anni hi ngaih pawimawh hmasakah kan dah a. Anni’n class an tan dan tur hi ngaihtuah hmasak a ni ang. Pawl 12 hnuai lam zawngin a ruala an tan hi a tha ber lo thei bawk a,” a ti.

Zirna in khar chhungin zirlaite’n lehkha an zir theih dan tur hi a theih ang anga ngaihtuah a nih thu a sawi a, Mizoram hmun hrang hrangah online leh offline tein zirtirtute’n zirlaite an zirtir tih a sawi. Zirlaite’n class an kal rei dawn loh avangin, course tihtawi dan tur pawh duan sa a nih thu a sawi bawk.

DM&R department chuan September ni 21 hnua sikul, college, educational coaching institution te kal dan tur MHA-in a duan dan tiang hian an puang:

  • Containment area pawnah chuan pawl 9 atanga pawl 12 inkar zirlaite chu anmahni duhtthlannain an zirtirtute rawn turin sikul an kal thei ang. Hemi tur hian an nu leh pa/guardian te phalna ziakin school-in an la tur a ni a, MoHFW-in SOP a siam chu khauh takin an zawm tur a ni.
  •  Sikulah teaching leh non-teaching staff te chu online teaching/ counseling pe turin 50% aia tam lo kal phal a ni ang. Sikul kal zawng zawngte hian MoHFW-in SOP a siam chu khauh takin an zawm tur a ni.
  •  Industrial Training Institutes (ITIs), National Skill Development Corporation emaw sorkar laipui hnuaia Ministry dang emaw state sorkar hnuaia short term training centre-a in-register te chu Skill/ Entrepreneurship training neih phalsak a ni ang a, MoHFW-in SOP a siam chu khauh takin an zawm tur a ni.
(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy