Mizoram Police-in thawktu leh lirthei an indaih lo em em a, hemi siamrem leh semrual chu an hnapui pakhat a ni tih Home minister K Sapdanga chuan a sawi.
Thingtlang lam police station hoa an lirthei thuamthat chu sum indaih lohna avangin tunah mai chuan tumna a awm lo tih a sawi a. Lirthei indaihlohna erawh department-in a hria a, lirthei chhe zawk deuh kawl, lirthei tha zawk mamawh chu a rem ang angin siamrem tum a ni tih a sawi.
“Hmun tinah thawktu leh lirthei an indaih lo em em a, mihring leh lirthei semrual hi an hna pui pakhat a ni,” minister hian ti.
Border outpost ho tih phuisui an ngai a, a khawia mah duhthusam a awm lo, tiin, “A theih anga tih phuisui tum a ni dawn,” a ti. Outpost leh infrastructure lamah an pachhia a, hmun hrang hranga police quarters leh housing tih changtlun tuma hma lak mek a ni tih a sawi a ni. Sawrkar hmasa in a thuphunga Lengpuia Police Outpost dah tura a lo tih tawh pawh thawktu leh outpost dinna tur sum indaih loh vang a ni a, an indaih hunah bul tan tum a ni dawn tih a sawi bawk.
Armed Police-te rifle allowance Rs.40 ni thin chu a letin, Rs.80 a tihsan phawt tum a ni Home minister hian a sawi a ni.
Thawktu leh lirthei semrual hi hnapui pakhat a ni – HM
