Daily Newspaper

Țhazual Awards (Gospel) 2020 an sem ta

13

Zonet cable TV leh Music Domain Mizoram (MDM) tangkawpin an buatsaih Țhazual Awards (Gospel) vawi rukna chu nizan hmasa khan Vanapa Hall-ah an sem leh ta. Coronavirus hripui leng avangin Țhazual Awards 2020 hi kum dang angin mipui chhim theih tura sem a ni lo va, award show pawh zan hnih atan buatsaih niin, a zan khatnaah Gospel bik sem a ni a, nizan khan Lengzem awards sem leh a ni bawk. Award hi sorkar inkaihhruai dan zawm chungin, sorkar phalna nei a sem a ni.

Ningani zan hian gospel bikah awards category parukah sem a ni a, award semnaah pawh hian sorkar inkaihhruainain a phalsak chin, chanvo neitu mi tlem azawng chauh an tel.

Show hi Rini Hlondo-in a host a, zan dar 8:00-ah țan niin, darkar khat awrh chauh hun hman a ni. Award semna hi kumina group indin thar Faktu-in an kick off a, anni bakah hian Ruthi Zonunsangi, Amtea, Stacy Punte, Swordtune, Grace Lalchhandami leh One in Christ feat. Isaac te an perform bawk.

Țhazual Awards 2020 Gospel bik-a award dawng zingah țum danga award la dawng ngai lo pathum an awm rualin, award lo dawng tawh pathum an awm bawk. Lalthlengliani Jongte, Zosangzuala Pachuau leh Stacy Punte te tan an award dawn vawi khatna țheuh a ni a, H. Lalremruati (Maruati) leh Zorinsanga Sailo ten award pahnih an dawnna niin, One in Christ tan award pathum an dawnna a ni ve thung. Maruati hian 2019 khan Best Female Artist (Gospel) a dawng tawh a, Zorina pawhin 2018-ah Best Music Video (Gospel) dawng tawhin, One in Christ-in 2017-ah award pahnih- Best Music Video (Gospel) leh Best Duo/Group (Gospel) an lo dawng bawk.

Kumin hian Leitlangpui tleirawl Stacy Punte chuan Best New Artist a dawng a, ani hi Lunglei lama a awm avangin award semnaah a tel thei lo a, a award dawn lawmthu sawina video clip play a ni. Best Songwriter award chu ‘Fak hla rimawi’ tih hla phuahtu Zosangzuala Pachuau-in a dawng, ani pawh hi hmun danga a awm avangin award semnaah a tel thei lo va, a aiawhin award hi a hla phuah satu Fiona Pachuau-in a dawn sak a, Zosanga award dawn lawmthu sawina pawh video clip tihchhuah a ni.

Țhazual Awards 2020 dawngtute chu:
Best Female Artist Gospel – H. Lalremruati
Best Male Artist Gospel – Zorinsanga Sailo
Best Music Video Gospel – ‘Mifel awm khawm’ Lalthlengliani Jongte
Best Songwriter Gospel – Zosangzuala Pachuau (Crosscraft feat Fiona Pachuau ‘Fak hla rimawi’)
Best Group Duo Gospel – One in Christ feat. Isaac
Best New Artist Gospel – Stacy Punte

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy