The Rolling Stones hla Billboard Hot 100 (singles) chart-a top 10 kai thei hmasa ber chu ‘Time Is on My Side’ tih hla kha niin, 1964 khan top 10 a kai a, tichuan, kum 59 dawn hnuah Rolling Stones chu BRIT Billion Award dawng thei zaithiam 25-na an ni ta a ni. He award hi Official Chart Company-in an chhinchhiah dana UK streama tluklehdingawn kai thei te hnenah hlan thin a ni.
Brit Billion Award an dawn rual hian award hlantu BPI chuan The Rolling Stones chu ‘artist daih rei ber’ tiin an puang hial a ni. Stones hla stream nasat zingah ‘Paint It, Black,” “(I Can’t Get No) Satisfaction” leh ‘Start Me Up” te pawh a tel.
BPI chief executives Dr. Jo Twist chuan, “The Rolling Stones anga chhuan tam tak paltlang thei hi artist chhiar tham lek an awm. An hla leh album te hian chhuan tam tak paltlang tawhin, an band pawh hman ami ang mai kha an la ni. BPI pawhin anmahni chawimawi nan BRIT Billion Award kan hlan thei hi kan phur takzet a, hei hian an rimawi chuai thei lo leh vawi thlenga fans thar an la neih zel zia hi a tarlang a ni,” a ti.
Kar kalta khan Stones hian Official UK Albums Chart-a an No.1 album 14-na an nei tling chiah a, an album thar ‘Hackney Diamonds’ chu chart No.1 a kai a, he album hi tun kum 18 chhunga rimawi thar an tichhuak lehna hmasa ber niin, Billboard 200 (albums) chart-ah pawh No.3 a kai a ni.
The Rolling Stones-in Brit Billion Award dawng
