Thi tura hrem Hasina-i’n thu remna fair lo ti
Bangladesh International Crimes Tribunal (ICT)-in amah paih thlak nana mipuiin nawrh an huaihawta mi tam tak an thihna avanga thi tura Thawhtannia a tih, prime minister hlui, Sheikh Hasina-i chuan a chunga thutlukna chu ‘tan bik nei’ leh ‘politic thil vang’ a nih thu a sawi.
A hremna tur puan a nih hnu lawkah Hasina-i chuan, “Ka laka thutlukna siam hi nasa taka hruai kawi tribunal-in an siam a, a hotu pawh mipui rorelna kalhmang awm miah lova thlan lal ni lo sorkar a ni,” a ti.
New Delhi-a biru mek, Hasina-i hian thiam loh an chantirnaa an puhnate chu a pha vek a, an rama rorel laiten an phuah kual niin a sawi.
“ICT-a min hekna zawng zawng hi engmah tih ka nei lo tih ka puang a. Khawi lam ve vea tangte pawh ni se nikum July leh August-a thite kha ka sun em em a; mahse, kei emaw, politic hruaitu emaw, tumahin lungawi loh lantirtute kha that turin thu kan pe lo,” a ti.
A chungthu an relna court-ah an hekna hnial thei turin hun tha an siam lo niin prime minister hlui hian a sawi bawk.
Hasina-i hi prime minister a nih chhung khan amah eptu politician mana hlawm lian tak taka miring dikna chanvo palzuta puh a ni a, heng zingah hian nikuma zirlai kaihhruaia lungawi lohna lantira thihna thleng pawh a tel a, chanchinbute a rap bet hle nia puh a ni thin bawk.
Hetih lai hian tuna a thubuai tak hi UN-in a tar lan dan chuan July leh August, 2024-a mi 1,400 vel thihna chungchang bik a ni.
July-a mi tam tak thihna kha Hasina-i kaihhruai Awami League party sorkarin sorkar hna hauhsakna an kalpui thar tur duh lohna lantirtu zirlaite an ni.
Hasina-i’n thuchhuah a siamah chuan ‘sorkar kal ta khawngaih zawng emawa awm judge leh advocate-te chu rorelna atanga hian paih emaw, tawng lo tura tihthaih an ni hlawm zel niin a sawi.
Hetiang thil hi a thleng ngai lo va, sakhaw zuitu tlem zawk emaw, ram leilung fa leh chanchinbu mite laka tharum thawhna thleng chhuinaah pawh tih ngaih a ni lo niin a sawi.
Bangladeshi prime minister hian dan bawhchhiaa puhnaah chuan thiam loh a chang dawn tih a hre sa tawh niin a insawi a, an ram pawna thubuai ngaihtuah that leh a duh tih a sawi a. Hasina-i hian puhtuten an puhna chu finfiahna chiang tak nen ennawn leh vek a cho nia sawiin Hague-a International Criminal Court lam a hawi tih a sawi.
“Sorkar lailawk ding mek hian he chona hi an pawm dawn lo va, ICC-ah chuan thiam ka chang dawn tih an hre sa a ni,” tiin a sawi a. ICC hian tuna sorkarin mihring dikna chanvo an palzut nasatzia a hre thar zawk dawn niin a sawi bawk.
Bangladesh-a sorkar lailawk chuan Thawhtanni vek khan India hnenah Hasina-i leh a home minister thin, Asaduzzaman Khan Kamal-a chu thawn haw turin an ngen nghal a. A mihringpuite laka dan bawhchhia hum chu ‘thian tha inkara tih awm loh’ a nih thu a sawi bawk.
Legal Adviser Asif Nazrul-a chuan sorkar hian India hnenah Hasina-i thawn haw tura ngenna a thlawn dawn tih a sawi bawk.
Thi tura hrem Hasina-i’n thu remna fair lo ti
