Site icon The Aizawl Post

THIAK IB TLAWH THU

By Mahmuaka Chhakchhuak

Jan. 3, 2023 (Thawhlehni)ah khan Pu Lalbiakthanga (U Bta) leh Maruali Khawlhringte nen Lunglei atanga Aizawl panin zing dar sarihah chiah Serkawn atanga chhuakin kan pathumin kan chhuak a. Titi pah zelin tluang takin kan tlan a, Thenzawl Lodge-ah chawlh kan tum nain an lo la inbuatsaih hman loh avang chuan Thenzawl khaw chhungah let lehin Restaurant-ah thingpui inin kan chawl ta zawk a. Kumthar tir ala nih bawk avangin Lirthei tlan pawh ala tam lem lo a, Sumo Service phei chu ala awm loh avangin motor tawh tur a tlem ang reng hle. Aizawl leh Lunglei inkarah hian hmun tlawh chakawm tak tak a awmin kei phei chuan tlawh loh ka la ngah hle. Chung ka la tlawh loh zingah chuan Thiak khuaa Bungalow hi a tel bawkin tlawhna hun remchang kan nei hlauh hi lawmawm ka ti hle a ni.

Aizawl leh Lunglei inkarah hian Bungalow engzatnge awm ka hre chiah lo nain Aizawl leh Champhai inkarah chuan Bungalow pariat a awm a, chungte chu hetiang hi a indawt dan a ni; Bung Bungalow, Seling Bungalow, Lumtui Bungalow, Khawthlir Bungalow, Kawlkulh Bungalow, Tuisen Bangalow, Neihdawn Bungalow leh Champhai Bungalow te a ni. Tunhmaah chuan khaw kar kawng kalna atan hian Lirthei an la hmang loin mi tam ber chuan kein an kalin mi tlemte chuan Sakawrin an kal bawk a, chutianga an kalnaah chuan Bungalow-te hi riahna atana an hman thin a ni. Bungalow nghaktu (Chowkidar) awmin anni hnenah chuan riah a rem leh rem loh an zawtin an dil hmasa thin a, chutiang chuan Hnathawhna vangin emaw Chiseh lain emaw an zin thin.
Aizawl leh Champhai inkara Bungalow awm zingah hian Tuisen Bungalow hi a awmna hmunin a zir vang pawh a ni ang a, a nuam thin em em a, Bungalow dang zawng aiin thlen nuam tia sawi thin a ni. Kum 1928 vel atanga hman tan a niin, a awmna hmun hi Tuisen phai leh Vaivengphai inkar tlangdung pharh nuam lai taka awm a ni a. A hmunhma hi a remchangin a nuam hle a, a bul vel hi ramngaw thelh nuam deuh mai a ni thin a, tun hnu deuh phei chuan Bangla bulah hian Bung, Far thingte leh Theihai, Serthlum leh thei chi hrang hrang an phun belh ta zel a. Bung zar duai mai te leh Far thing ding thelh thulh mai te chuan chulai hmun chu a ti nuam thin hle a ni. Heng Bangla-te hi Sap ho sak a niin nikhat ban tawk hisapa sak a ni deuh ber thin.

Aizawl khawpui chhungah leh khawpui pawn lamah ngei pawh Sap ho kuthnu hmun pawimawh leh hlu tak tak a awm a; Sairang Police Out Post, kum 1890-a sakte, Sairang hmun bawka Police Staff Quarters, kum 1905 vela sakte, kum 1902 vela sak Doctor Quarter te, Sairang Dispensary (Isolation Room), kum 1899-1900 vela sakte, kum 1902 kuma sak Hospital Quarter te mai bakah kum 1905 vela sak tawh Sialsuk hmun Inspection Bungalow (IB), hetih lai vel bawka sak IB Kitchen te, Kum 1918 a sak Doctor Quarter te leh Dispensary building-te hi Sialsuk hmun bawka awm a ni. Sialsuk hmun bawka Compounder’s Quarter pawh hi kum 1918 kuma sak a ni. Siaksuk thlenhma lawk Thiak hmuna Inspection Bungalow (IB), kum 1903 a sak pawh tha takin ala awm a, Paikhai hmuna IB, kum 1903-a sakte pawh hi kan thil hlu neih pawimawh tak zinga telh a niin INTACH lamin Heritage Building atana a neihte an ni.

Lungsen khuaa Inspection Bungalow (IB) pawh hi kum 1904 daih tawha sak a ni a, Tlabung Bangla pawh hi kum 1871- 1872 kuma sak a ni. Tin, Siaha District-ah Pioneer Missionary Bungalow, Serkawrah kum 1914-a sak chu a awm bawk a, Tuipangah Medical Quarter, kum 1929 – 1936 a sak chu awm bawkin Kolasib District-ah Inspection Bungalow (IB), kum 1906-a sak chu a awm bawk. Zanlawnah pawh kum 1906 vela sak tawh Tawitaw Bangla tia hriat lar zawk IB ala awm bawk. Khawzawl District-ah pawh pakhat awmin Kawlkulh khuaa Inpection Bungalow (IB), kum 1908 kuma sak phei chu ala tha hlein mikhual thlenna atan ala hmantlak reng bawk. Hengte hi Heritage Building-a neih mekte an ni.

Hetiang hian Mizoram chhunga Sap ho kutchhuak Bangla hmun tam takah a awm a, a thente chu enkawl mek la niin thlenna atan pawha la tha takte an ni bawk. Chutiang zingah chuan |hiak Bangla hi tlawh manhla tak a niin keini ngei pawh chuan hi darkar khat aia rei mah tur chawlin hun kan hmang nghe nghe a ni. Khawtlangin a hmun leh hma hi an lo enkawl tha hle a, sam fai mai duhtawk loin a tual vel zawng zawng phei chuan an lo thlo fai vek bawk a, a kiang lawkah thing lian tak tak a din bawk avang chuan ramngaw ang maiin ala awm a, nuam kan ti hlein a kawt maia Saron par buk tak mai lo awm bawk chuan a cheimawi hlein a hmunah duh aia rei awm a awl viau a ni.

Kum 1903 daih tawha sak ni mahsela |hiak Bangla hi mikhual thlenna tlakin ala tha a, tuaihnum loh vanga luah loh mai mai a ni ber awm e. INTACH lam pawhin Heritage Building atana a thlan a nih tawh bawk avangin leh kan hmun pawimawh tak a nih avang hian mipui, khawtlang leh sorkar lamte nen pawha tangrual a enkawl that reng a duhawm hle a ni. Bangla chhak maiah hian Tuizem lian tak a awm a, chumi chhak, feet 5 vel turah hian Eirawngbawlna In (Kitchen) a awm bawk a, chungte pawh chu tlemin a han tlabal deuh tak naa ala tha hle. Bangla vei lamah, a tualzawl aia hniam deuh turah hian Ek In a awm bawk a, chu erawh a tlabal ang reng viau thung nain a chung erawh ala tha viau thung. |hiak Bangla hian danglamna bik tak a nei a, chu chu a tukverh kawngkharte hi a thuah veka siam a niin a pawn zawkah thingphek hi darthlalang anga vuah a niin a hawn theih vek bawk a, tukverh chhung zawkah erawh pangngai takin darthlalang vuah a ni thung a, an uluk zia kan hrethiam mai awm e. Bangla kiang lawkah hian Sakawr thlunna In pawh a awm thin a, chu erawh a chhe tawh niin min hrilh.

Aizawl atangin |hiak hi 44 Kms chauh a niin Aizawl atang pawha panna hla lo tak a nih avang hian thian ho emaw pawl hoa hun hmanna atan pawh hman theih tura buatsaih a tha hle a, khaw chhung tho si hmun fianrial deuh taka awm a nih avang hian thawm bengchheng awm loa zalen taka hun hman theihna hmun tur a ni. Lirthei a luh theih bawk si avangin leh a tualah Lirthei engemawzat a dah theih bawk avang hian midang tibuai loa hun hman theihna hmun tur rem tak a ni a, chutiang tur chuan sorkar lam pawhin buatsaih thei sela a duhawm hle a ni. Mikhual thlenna atan a ni emaw ni lo emaw kan hmun pawimawh te hi kan enkawl that loh chuan nakin lawkah hian a hlimthla chauh hmuh tur ala awm ang a, sebo hnua se kawngkhar an tih ang maiin kan inchhirna hi a sei palh ang e.

Exit mobile version