Kan thiante hi kan ngaihzawng an ni thei em? tih emaw ‘Kan ngaihzawng te hi kan thian an ni thei em? tih zawhna hi inhnialna tawp thei lo a ni ve bawk awm e. Han ngaihtuah vang vang teh, tunge nangmah hrechiang ber tu che? I lungngaih laia hnem thintu che tu nge- i thian nge i ngaihzawng? A buaithlak khawp mai, mahse, thil pakhat awm thei chu, mipa leh hmeichhia, inthian tha tak te hi an inthianthatna piah lamah chhunglama inzawmna nghet tak a awm thei a nia.
A nih leh i thian chu i ngaihzawng a ni thei em? Mipa leh hmeichhe inkara inthian thatna chu inngaihzawnna boruakah a inher daih thei tlat mai. A nih leh engtin nge chutiang boruak chu in hawi tan tih i hriat theih ang? Chhiar zel rawh le:
1. I thian chuan nangmah nen chauh awm fal a duh ta deuh fo em? In pahnih chauha an awmdun chang a tam ta riau a nih chuan inngaihzawnna boruak a tel tan tihna a ni thei.
2. In taksa a innawk fuh ngun ta riau em? Entir nan, eng emaw chhuanlam siamin i hmai emaw i sam emaw han kheuh zeuh te. Thian inkuah anga han inkuah deuh chang te a tam ta riau em? Chutiang a nih chuan inngaihzawnna boruak a awm tan tihna a ni thei.
3. Zan rei tak tak thlengin in inbe ngai em? Thiante chu an inbe chamchi alawm, mahse, zan rei tak thlenga nangmah chauh a rawn be tang tang che a nih chuan boruak danglam a awm tan tihna a ni thei.
4. Ngaihzawng leh hmangaihna chungchang a sawipui fo che em? Chutiang a sawipui fo che a nih chuan inngaihzawnna chungchanga i rilru put hmang hriat a tum tihna pawh a ni thei a, ngaihzawng anga boruak kalpui a fuh dawn leh dawn loh a ngaihtuah tihna te pawh a ni thei.
5. Thian dangte nena awm khawm laiin engtin emawa han tih deuh bik che emaw, special deuh bika lan tir che emaw a tum ngai em? Thian dangte nena awmkhawm laia a ngaihven deuh bik riau che a, nuam lo i ti ang tih hlau niawm taka a lan fo chuan, eng emaw tak a awm tan tawh a ni.