Daily Newspaper

Thiem-a’n hma lam pan zel

15

US Open 2020 khelh mekah mipa lamah Grand Slam-a champion tawh zawng zawng an tla zo tawh a, champion thar an awm ngei dawn. Champion tura rinkai ber Dominic Thiem chuan hma lam a pan zel a, Grand Slam-ah a vawikhat nana champion turin rahbi a tuk belh zel. Champion tura rinkai zinga mi Medvedev pawhin awlsam taka hnehna changin quarter final a inhlangkai ve bawk.

Second seed Dominic Thiem hian last 16-ah 15th seed Felix Auger-Aliassime a hmachhawn a, harsatna lian a tawk lo. Kum 20 mi Auger-Aliassime leh Thiem te hi set khatnaah an inbei tawk nghal viau a, tie-break khelh a ngai nghal pang. Tie-break-ah hian 7-4 chungnungin Thiem hian set khatna a la. Set dang zawngah chuan Thiem a chungnung ta larh thung a, second round-a Andy Murray hnehtu Auger-Aliassime chu 7-6 (7-4) 6-1 6-1 a hnehin quarter final a inhlangkai.

Thiem hi Djokovic, Nadal leh Federer te tih lova player beiseiawm ber pawl ni reng a, Grand Slam final vawithum lut tawh Thiem hi final-ah a la vanduai zel a. Player langsar pathum ngawt an awm tak loh vangin champion theihna hun tha tak a neia ngaih a ni.

Thiem rual hian third seed Daniil Medvedev pawhin hma lam a pan zel a, fourth round-ah awlsam taka hnehna a chang a, quarter final lut turin darkar khat leh minute 38 chiah a mamawh. 2019 final-ah uiawm taka tlawm Medvedev hian American Frances Tiafoe a hmachhawn a, 6-4 6-1 6-0 in hnehna a chang a, quarter final-ah a hnampui Andrey Rublev a hmachhawn zui leh ang.

Medvedev hmachhawn tur Rublev hian sixth seed Matteo Berrettini a hmachhawn a, set khatna a hloh hmasak zet hnuin 4-6 6-3 6-3 6-3 in a chak let a, quarter final a inhlangkai a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy