Daily Newspaper

Thiem hmachhawn tur Medvedev

34

Flushing Meadows, New York a khelh mek US Open 2020 chu a hmawrbawk a hnai zel a, semi final-a inkhel tur a hriat kim tawh a. 2019 finalist Daniil Medvedev leh second seed Dominic Thiem te semi final-ah an inhmachhawn dawn a, anni pahnih inkhel hi final ai pawha hmuhnawm zawk leh ngaihven hlawh zawk ni tura ngaih a ni.

2019 final-ah tha taka bul tana a, champion ngei tura ngaih a nih hman laia chesual a, Nadal lakah uiawm taka tlawm Medvedev hian quarter final-ah a Russian pui Andrey Rublev a hmachhawn a, set hloh lo bawka hnehna changin, US Open 2020-ah set hloh a la nei miah lo. Semi final-ah khingpui hau tak zawk nei a, fiahna hmachhawn turin semi final a inhlangkai.

Medvedev leh Rublev te hi set khatnaah an inhnehtawk hle a, game an inlakchhawk zak zak hnuin tiebrek khelh a ngai nghal pang. Tie-break-ah pawh an inum zak zak hnuin Medvedev a chungnung hram a, harsa takin set khatna a la. Set hnihnaah Medvedev a chetha ta hle a, game thum chiah hlohin set ala zui leh. Set thumnaah an inhnehtawk leh pek leh viau a, tiebreak khelh ngai zui leh in Medvedev bawk chungnung zawkah a tang leh a, 7-6 (8-6) 6-3 7-6 (7-5) a hnehna changin, US Open 2020-ah khel tha ber, set hloh nei lova kaltluang awmchhun a ni mek a, Novak Djokovic a tlak tak bawk si vangin Russian Medvedev hi champion tura rinkai ber a ni.

Djokovic, Nadal leh Federer tih lova player langsar leh beiseiawm ber pawl ni reng thin Dominic Thiem chuan a vawikhat nan US Open semi final a lut ve ta nawlh a, Grand Slam-ah a vawikhat nana champion turin vawihnih chak chiah a mamawh tawh. Thiem hian quarter final-ah Australian Alex de Minaur a hmachhawn a, nuamsa takin hnehna a chang. Thiem hian set khatna leh set hnihnaah game thum chiah hlohin set a la a, quarter final-a a set harsa ber; set thumnaah pawh game li baka a hloh chuang lova 6-1 6-2 6-4 a hnehna changin semi final a inhlangkai.

Semi final-a inhma-chhawn tur kum 24 mi Daniil Medvedev leh kum 27 mi Dominic Thiem te hi vawithum an inhmachhawn tawh a, vawihnih chak zawka tang Thiem a chungnung hret. Thiem hian an intum hmasa pahnihah a hneh zawn a, an intum hnuhnun ber tumin Medvedev a chak zawk ve thung. An intum hnuhnung ber hi 2019 ah khan niin Hart Court-a khelh ATP Masters 1000 Canada-ah a ni a, Thiem hian set la lovin Medvedev a ngam lo. US Open hi Hart Court ah khelh a ni a, Medvedev-a khelh thiamna hmun a ni. Thiem leh Medvedev te hi Hart Court-ah vawihnih an intum tawh a, vawikhat ve ve an chak a, US Open semi final-a an inhmachhawn tur hi an tan fiahna pawimawh tak a ni ngei ang.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy