Daily Newspaper

“Thil dik lo ti” Duhoma thlavang Congress-in hauh dawn lo

14

Congress president Lal Thanhawla, chief minister hlui chuan MLA atanga bantir Lalduhoma thlavang hauh zel tur a ni lo tiin a sawi a, “thil dik lo tite” thlavang hauh tur a ni lo tiin a sawi.

December ni 15 khan kumin atan Congress Bhavan an khar a, he huna thusawitu Lal Thanhawla chuan Duhoma chungchang hi a sawi a, “Pu Lalduhawma hek a nih avanga thlavang hauh chu tih tur a ni a, ban a nih avanga tawrhpui pawh a tul bawk. Mahse speaker berin dan hmanga a ngaihtuah a, ban a nih tawh chuan thil dik lo tite thlavang chu hauh zel tur a ni tawh lo,” a ti niin Congress thuchhuahah tarlan a ni.

“Serchhip bial bye-election-ah Congress party chuan phur tak leh nuam ti takin kan chuh dawn a. Serchhip bialin Congress MLA chak leh tha tak an nei thuai dawn a, chumi atana chuan ruahmanna fel tak siam vek tawh a ni,” Hawla chuan a ti.

“Phaizau-a khawtlang humhalh lui sangha, bialtu MLA ngeiin dan phal loh hmanga ngawidawhna hmanrua puak thei a hmang chu zahthlak a ti a, mipuite tana rorel tlak loah a ngaih thu a sawi bawk,” tiin an party thuchhuahah Hawla thusawi tarlan a ni bawk.

UPC (NEI) general secretary Rev R Lalrinsanga’n hunserh a hmang a, “Hun rei tak Pathianin Mizoram mipui rawngbawlna leh enkawlna hna Congress party kutah a dah a, a hun takah ram leh hnam tan a hung chhuakin a thukru thin,” a ti niin thuchhuah chuan a tarlang a, sakhuana leh politics hi lakhran tum awm mah se lakhran tak tak theih a ni lo tiin a sawi a, mi chanhai, rethei leh dinhmun chhe zawkte rahbeh hi Pathian huatzawng a ni a, an lamah Pathian a tang a, an tan sorkar hi a ding tur a ni tiin a sawi tih an tarlang bawk.

Congress treasurer Zodintluanga’n hun a kaihruai a, Joseph Lalhimpuia, H Rohluna leh Ngunlianchunga te’n report an pe a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy