Kawng chhia avanga mamawh hrang hrang phurtu lirthei a luh that theih loh lai a, thil man a san zel lohnan veng turin sawrkar an phut tih Joint Civil Society of Mizoram chuan an sawi.
Joint Civil Society of Mizoram (JCM) chuan, Kawnpui – Sairang inkar kawngpui chhe lutukin Mizoram chak lakna a dan chah avangin, kawng a that theihna atan hma an la a. Hei hian rah tha chhuahin Mizoram sawrkar, PWD leh NHIDCL-in kawngpui a that theihna atan theihtawp an chhuah nia an hriat thu sawiin, lawmthu an sawi a ni.
Kawngpui chhia avang hian Mizoramah nitin mamawh ei leh bar tur, petrol leh diesel, in sakna bungraw hrang hrang leh medical supplies thlengin phurhluh hleihtheih a nih loh avangin thil man a sang chho zel nia an hriat thu JCM hian sawiin, thil man sang hian mipui tan, a bikin mi harsa leh rethei zawkte tan buaina nasa tak a siam tih a sawi.
Sumdawnna hrang hrang khawihtute chu Mizo tlawmngaihna leh rinawmna vawngnung a, hlawkna uchuak um lo a, mipui tana tha tura ding a, an bungraw neih ang ang chheprelh lo turin an ngen tih a sawi bawk.
‘Thil man a san zel lohnan hma la turin sawrkar kan phut a. District tinah thuneituten an thuneihna hmang tangkaiin, diklo taka thil man a san lohnan dan leh thupek kengkawh turin kan ngen a ni,’ JCM chuan a ti.
Thil man a san zel lohnanveng turin sawrkar an phut
