Daily Newspaper

THIL TIH THEIHNA

19

PC Thangzikpuia

Mizo tawnga compounded verbal noun ni ngei ngei tur si, Sâp tawng thumal kan lo entawn luat avànga dik lo pui puia solid/closed compound noun-a chher luih tâk rawk hi Mizo tawngah hian kan ngah mai a. Sâp tawngah thumal a nih avàng maia Mizo tawngah pawh thumal ni ve zêl tur emaw tia kan mi hmasate’na ‘power’ lehlin nâna ‘thiltihtheihna’ tia mi an lo ziah zawmsak tâk rikrawk te hìan vawiin thleng hian kan Bible leh kan dictionary-ah te meuh pawh hmun an la luah ta vèng vùng mai a ni. Hêng hi thu ziak mi nia kan ngaihte lah hìan a dik a dawk pawh thlu hlei lovin an lo zerawk (xerox) ve nghal zung zung zel mai bawk a. Hêng avàng te hian Mizo tawng thumal der…ni lo; Mizo tawng thumal suak hi kan thu leh hla ropui tak takah te hian a ngap ta tèn tùn mai a nih hi!

Mizo tawng kal phung (kalphung—ni lovin)-ah chuan transitive verb thumal modified form nei chi hi gerund-a kan hman chuan a subjunctive mood form zêl hi gerund-ah hman thin a ni a. Entir nân: ‘hria, hmu, nei, zuar…adt.’ tihte hi transitive verb thumal an ni a. Hêng hi gerund-a kan hmannaah chuan, “Hriat i va ngah ve,” tiin leh, “Hmuh i nei em?” tiin leh, “Neih ka nei lo,” tiin leh, “Zawrh i nei em n?” ti tein an subjunctive mood form ‘hriat, hmuh, neih, zawrh’ tihte hi gerund-ah kan hmang thin a. Hetiang bawk hian transitive verb thumal ‘ti’ pawh hi, “Tih nei lovin awm mai mai suh,” tiin a subjunctive mood form ‘tih’ hi gerund atân kan hmang thin bawk a ni.

Hetianga transitive verb thumal gerund-a kan hmante hìan anmahni ti kimchangtu (complement) atân anmahni object hrang hrang an chhawm thei ta a. Chûngah chuan gerund-in noun thumal ‘thil’ hi complement atâna an chhawmnaah chuan, gerund leh complement chu ziah zawm lohin ‘thil tih, thil hriat, thil hmuh, thil neih, thil zawrh’ tih a lo ni ta a. Hêngah hian gerund leh complement hi eng vàng mahin ‘thiltih, thilhriat, thilhmuh, thilneih, thilzawrh…adt.’ tia ziah zawm tur hi a ni ngai lo a; ziah zawm loha ‘gerund phrase’ an nih hian Mizo tawng grammar-ah a dik ta a ni.

Hetianga gerund atâna transitive verb thumal kan hmante’n complement atâna anmahni object an chhawm bâkah hian, modifier atân adverb emaw, auxiliary verb emaw an la chhawm thei cheu bawk a. Tichuan, gerund-in complement atâna noun thumal ‘thil’ an chhawm bâka auxiliary verb thumal ‘theih’ hi modifier atâna an chhawm tel bawk chuan, gerund leh complement leh modifier inkawp tlâng ta chu ‘thil tih theih, thil hriat theih, thil hmuh theih, thil neih theih, thil zawrh theih’ tih a lo ni leh ta a. Hêngah hian gerund leh complement leh modifier phusa tlâng tate hi eng vàng mahin ‘thiltihtheih, thilhriattheih, thilhmuhtheih, thilneihtheih, thilzawrhtheih’ tia ziah zawm tur hi a ni lo leh ta a; ziah zawm loha ‘gerund phrase’ an nih hian a la dik leh ta thlap zel a ni.

Tichuan, hêng gerund phrase-ah te hian verbal noun marker ‘na’ a rawn beh chuan ‘thil tih theihna, thil hriat theihna, thil hmuh theihna, thil neih theihna, thil zawrh theihna…adt.’ tih a lo ni leh ta a. Hêngah hian verbal noun maker ‘na’ a beh tâk avàng maiin ‘thiltihtheihna, thilhriattheihna, thilhmuhtheihna, thilneihtheihna, thilzawrhtheihna…adt.’ tia thumala chher daih tur hi a ni lo leh ta a; ziah zawm loha ‘compounded verbal noun’ an nih hian Mizo tawng grammar-ah a dik tluan chhuak leh ta mai a ni.

Hetiang hi Mizo tawng grammar-a gerund-in complement leh modifier a chhawmnaa verbal noun marker a rawn beha an nih phung (nihphung—ni lovin) dik chu a nih lâiin, compounded verbal noun ni ngei ngei tur si kha ‘thiltihtheihna’ ti tea kan ziah zawm tlat reng mai chuan, gerund leh complement leh modifier inkawp, verbal noun marker behna thu dang zawng zawng pawh thumal kan nihtir ve vek a ngai ang a, ‘thilngaihtuahtheihna, lehkhathìamtheihna, thusawitheihna, pawisahlawhtheihna…adt.’ tih ang chi thumal te hi kan nei duah mai dawn tihna a ni a; a chhan chu—form inang chiah chiah vek ni miau hek!

Transitive verb thumal, gerund-a kan hmante hian noun thumal chang ni lo, noun phrase pawh complement atân an chhawm thei vek a. Chuvàngin, gerund-in complement leh modifier a chhawmnaa verbal noun maker a rawn beha ‘thiltihtheihna’ tia thumala chher daih hi a dik a nih ngat zawngin, ‘engkimtihtheihna’ tih ang chi thumal te pawh hi a awm ve nghal ang a; chu mai ni lovin, gerund-in complement atâna noun phrase a chhawmna ang chi rêng rêng pawh ‘thilmaktihtheihna, thilropuitihtheihna, thilmakchungchuangtihtheihna’ tia thumala chherin a dik ve vek dâwn tihna a nih chu—hem mai a!

Mizo tawng grammar-a form inang theuh ni si, a then kan ziah zawm loh lâia ‘thiltihtheihna’ tia ziah zawm bik tur emaw kan tihna chhan (tih chhan—ni suh e) hi chu, Sâp tawng lama ‘power’ tih thumal kan entawn vàng mai mai lek hi a ni a. Sâp tawng lamah ‘power’ hi thumal a nih avànga Mizo tawngah pawha a lehlinna hi thumal nihtir ve phêt kan tum zel dâwn te a nih chuan, ‘powerful’ pawh ‘thiltihtheihnangah’ tiin emaw, ‘thiltihtheihnaneitam’ ti emawa thumala kan chher a ngai ve zel bawk dâwn tihna a ni mai a; hetianga kan tawng hi a ziah danah Sâp tawng antir phêt kan tum zel dâwn a nih chuan, kan literature huangah hian Mizo tawng thumal maksak pui pui hi a ngap tèn tùn reng mai dâwn a ni.

Chuvangin, Mizo tawng hìan amahin kal phung hran hlak a nei ve a ni tih kan la hmuh fiah hmâ leh, grammar lama kan la men fiah hmâa ‘dik emaw’ kan lo tih thin, lo dik miah si lo tam tak hi a dika kan thlâk leh ngam hi a hun tawh tak zet a. Transitive verb thumal, gerund atâna kan hmanin complement leh modifier a phusakpui tawhna rêng rêng hi chu ‘gerund phrase’ a ni zat zat zel a; chûng gerund phrase-a verbal noun marker a rawn beha ‘compounded verbal noun’ ni ngei ngei tur si, thumal tur emaw tia dik lo pui puia kan Bible leh kan dictionary-ah te meuh pawha ‘thiltihtheihna’ ti tea kan lo chuantir kumkhua tawh hi, ‘thil tih theihna’ tia a dika kan ziah hi a hun ta a ni.

Vawiina mite hìan a dik hre reng chung pawha kan la ngaihthah lui duh zel dâwn a nih chuan, thangthar grammar thiam ril tak takte hìan Mizo tawng grammar dik dinchantirna turah, hêng thumal piang sualho hi chu dimdawihna nei map lovin an la rawn nghaisa tho tho dâwn a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy