Thin Tha lo lanchhuah dan kan hriatthiam loh avanga kan ngaihthah thin

Thin tha lo lanchhuah dan kan hriatthiam loh avanga kan ngaihthah thin
Thin hi kan taksa peng pawimawh tak a ni a, kan taksa a thisen zawng zawng thlifimtu, bile siamtu (bile chu mìt a thil tui hring hi a ni a, digestive fluid a ni), infection laka min vengtu leh amino acid regulator a ni bawk. Thin chu a tha lo thei a, a that loh dan hi a lanchhuah dan ngaihthah mai a awlsam avangin ‘silent killer’ ti te pawhin an sawi fo a ni. CDC-in a tarlan dan chuan US-a cheng mi maktaduai 35.5 te chuan thin lam natna an nei a, mahse, a tam zawk mahin an inhre mai lo. Tun tumah hian Times of India-in thin tha lo lanchhuah dan kan hriat lar vak loh, mipa leh hmeichhia ten kan ngaihthah mai mai loh tur ni a an sawi te kan rawn tarlang e.

1. Chau leh zawi deuh ngawih ngawih: Hnathawh nasat leh thildang eng emaw vang pawh ni lo, a chhan hriat tur awm si loin i chauin i zawi deuh riau thin a nih chuan, thin lam fel lo vang a ni thei. Thin-in hna a thawh that loh chuan kan thisen a thil tha lo a thlifim zung zung thei lo a, kan energy level a support tha thei lo a, chu chuan min tizawiin, min ti chau thin. Kan chau a ni satliah mai lo a kan taksain tanpui a mamawh tih a lantirna a ni. Thin hrisel tha lo chuan hna a thawk tha lo a, thisena bawlhhlawh leh thil tha lo awm te a thlifim tha thei lo a, chuvangin zawi leh chau deuh ngawih ngawih angin kan awm a, damlo tur anga inhriatna te pawh kan nei thei.
2. Vun rawng danglam: Thin tha lo lanchhuah dan tlanglawn tak pakhat chu vun rawng lo danglam hi a ni a, a bik takin a rawng a lo dâng a, a eng ang deuh ten a hriat theih. Vun mai bakah mitmu a a var tur lai chu a lo eng bawk thin. Hetianga kan vun rawng leh mitmu rawng a lo danglam a nih chuan thin lam fel loh vang a ni duh hle. Hei bakah hian vunah duk a insiam thei bawk a, nghawng leh zakhnuaiah a ni duh lehzual a, hetiang hi hmeichhiaah a ni duh deuh bik bawk.
3. Hepatic encephalopathy: Hei hi chu thin hnathawh that loh avanga thluak lama a nghawng a ni ve thung a, depression emaw thluak lam fel lo emaw tih mai te pawh a awl duh viau. Thin-a thil tha lo (toxin) chu thlitfim that a nih loh chuan chung thil tha lo chuan thluak a thleng a, thluak hnathawh a tibuai thei. Thil chhinchhiah an harsat a, an haihawt hle a, rilru leh ngaihtuahna chiang lo deuh riai ten an awm a, mood swing a nasa bawk thin.
4. Vun lama harsatna: Thin tha lo hi vun natna angin kawng dang dangin a lang chhuak thei. Palmar erythema an ti a, kutphah vun rawng a sen vak thin; spider angiomas an tihah chuan vun hnuaia thisenzam lang chhuak chu maimawm ril zam ang deuhin a darh nuai a, a sen deuh tiak thin; vun a duk rawn awm leh ringawt thin te, vun thak vak thin te pawh thisena bile salt tam vang a ni thei.
5. Hmeichhe tan thlatin hunbi mumal lo: Hmeichhe thlatin hunbi neih dan hian thin lam natna a entir thei a, hunbi mumal lo emaw, a changa thi chhuak tam vak a changa tlem leh si te, thlatin hunbi awm loh tlat te pawh hi ngaihthah loh tur a ni. Thin hnathawh hian hormone metabolism-ah kawngro a su thui hle a, hormone regulator a ni tel bawk a, chuvangin thin-in hna a thawh that loh chuan hmeichhe thlatin hunbi a tibuai thei thin a ni.
6. Tihrawl chak lo: Sarcopenia an ti a, muscle wasting/ muscle loss te pawh an ti a, thinin hna a thawh that loh chuan protein leh nutrient te a lo chingchip tha lo thin a, chu chuan tihrawl a nghawng thin. Hei hi exercise lak dan emaw ei leh in emaw vangah an ngai fo a, hetiang hi i nei ngun riau emaw a awm dan a nasa riau emaw a nih chuan thin lam fel loh vang a ni thei. Hetiang hi cirrhosis leh thin natna chi dang neiah a awm duh lehzual niin National Institutes of Health-in a tarlang.
7. Zun rawng tak leh ek rawng dal: Zun rawng a duk/tak a, a rawng eng atanga a uk ang te pawh a ni thei a, zun rawng chu chutiang deuh hlir a nih reng chuan thin lam fel lo vang a ni duh hle. Thin hian compound rawng eng, bilirubin chu zun atangin a paih chhuak thin a, chutiang chu a tih that theih loh chuan a lo inchekkhawl a, zun rawng a lo tak/duk ta thin. Hei bakah hian thin chu bile juice siamtu a ni a, bile chu ek rawng siamtu a ni. Thinin bile a siam chhuah that loh chuan ek rawng a lo dal/dâng emaw vut rawng (grey) ang deuh ten a awm thin.